मछुआरा अउ वोकर आत्मा
मूल रचना - आस्कर वाइल्ड
अनुवादक - कुबेर
रोज, सांझ होतिस तहाँ ले नौजवान मछुआरा हा समुंदर म चल देतिस अउ उहाँ अपन जाल ला पानी म फेंक देतिस।
जब जमीन डहर ले हवा चलतिस तब वोला कुछुच नइ मिलतिस, कभू एकातकनी मछरी मिल घला जातिस, काबर कि हवा के गति हा बहुत तेज होतिस अउ समुंदर म ऊँच-ऊँच लहरा उठतिस फेर जब समुद्र तट कोती ले हवा चलतिस तब गहुर पानी के मछलीमन तीर म आ जातिन अउ वोकर जाल म फंस जातिन। तब खुश होके वोहर बजार जातिस अउ वोला बेंच देतिस।
हर दिन सांझ के वोहर मछरी धरे बर जावय। एक दिन जाल ला खींचिस तब वोहर अतका वजनी हो गे रिहिस कि वोला डोंगा म खींच के ला पाना मुश्किल हो गिस। वोहर हाँसिस अउ मनेमन सोचिस ’समुद्र के जम्मो मछलीमन फंस गे हे तइसे लागत हे। कोनो राक्षस हा तो नइ फंस गे होही जउन ला देख के लोग बाग हैरान हो जाहीं या कोनो भयानक जीव फंस गे होही जउन ल देखके महारनी हा घलो खुश हो जाही।’ वोहर पूरा ताकत लगाके जाल के रस्सीमन ला खींचिस। वोकर बांहा के नसमन दिखे लगिन जइसे कि कांसा के बर्तन म नीला रंग के नक्काशी करे गे होय। वोहर अउ जोर लगा के पतली डोरी मन ला खींचिस। जाल के खाल्हे गुंथाय कार्कमन दिखे लगिन अउ जाल हा पानी के ऊपर आ गिस।
फेर वोमा कोनो मछली नइ रिहिस। न कोनो राक्षस रिहिस, न कोनो अजीब चीज; बल्कि उहाँ एक सुंदर असन जलपरी रिहिस जउन हा बेफिकर होके सुतत रिहिस।
वोकर चूंदीमन सोन के ऊन कस गीला रिहिन, अउ वोकर रेशा-रेशा हा कांच के कटोरी म रखे धागा समान दिखत रिहिन। वोकर बदन हा हाथी दांत कस सफेद रिहिय अउ वोकर पूछी हा चांदी अउ मोती ले बने रिहिस। पूछी म समुद्र के हरियर गादमन लपटाय रिहिन। वोकर कानमन सुतई कस रिहिन अउ ओंठमन मूंगा के समान लाल रिहिन। समुद्र के ठंडा लहरामन वोकर छाती ला छूवत रिहिन अउ वोकर पलकमन म नमक के परत हा चमकत रिहिस।
वोहर अतका सुंदर रिहिस कि वोला देखके नौजवान मछुआरा हा चकित हो गिस। वोहर अपन हाथमन ला लमाइस, जाल ला अपन नजीक खींचिस अउ अपन डोंगा ले निहर के वोला अपन बांहा म कंस के भर लिस। तब जलपरी हा झकनका के जागिस अउ चकित होके कोनो समुद्री चिरई कस चीख परिस। वोहर अपन बैंगनी-नीला आँखीमन ला फार के मछुआरा ला देखिस अउ खुद ला छोंड़ाय खातिर छटपटाय लगिस। फेर मछुआरा हा वोला कंसके धरे रिहिस। वोहर नइ छूट सकिस।
अउ जलपरी हा जब खुद ला नइ छुड़ा सकिस तब रोय लगिस अउ किहिस, ’’मंय हा तोर ले बिनती करत हंव, मोला छोड़ दे। मंय हा राजा के इकलौती बेटी हरंव। मोर बाप हा एकदम अकेला हे अउ बुढ़ा गे हे।’’
तब जवान मछुआरा हा किहिस, ’’मंय हा तोला एके शरत म छोड़हूँ। तंय हा मोर ले वादा कर कि मंय हा जब भी तोला बलाहूँ, तंय हा दंउड़त आबे अउ मोर बर सुंदर असन गीत गाबे। समुद्र के मछरीमन समुद्रीच जीव के आवाज ला पसंद करथें। तंय गाबे तब मछरीमन सकलाहीं अउ मोर जाल हा भर जाही।’’
जलपरी हा किहिस, ’’मंय हा तोर ले वादा करहूँ तब का सच म तंय हा मोला जावन देबे।’’
जवान मछुआरा हा किहिस, ’’हाँ, बिलकुल छोड़ देहूँ।’’
तब जलपरी हा मछुआरा के केहे मुताबिक वोकर ले वादा करिस। मनमार के अपन संगवारीमन के कसम खाइस। तब मछुआरा हा वोला पानी म ढील दिस। जलपरी हा तुरते डर के मारे कांपत-कांपत गहुरी पानी भीतर समा गिस।
रोज सांझ के समय जवान मछुआरा हा समुंदर मा जावय। जलपरी ला बलावय। जलपरी हा वोकर नजीक आतिस अउ वोकर खातिर सुंदर-सुंदर गीत गातिस। वोकर चारों मुड़ा डाल्फिन मछरी तंउरे लगतिन। वोकर ऊपर समुद्री चिरई मन उड़े लगतिन।
तब वोहर एक ठन बहुत सुंदर गीत गाइस। वोहर समुद्र म रहवइया वो मनखेमन के गीत गाइस जउनमन अपन मवेशीमन ला एक गुफा ले दूसर गुफा म लेगथें अउ छोटे बछरूमन ला खांद म बोहथें। अउ फेर समुद्री देवता ’टाइटन’ के गीत गाइस जेकर लंबा हरियर दाढ़ी, अउ रूआँ ले ढंकाय छाती हे अउ जउन हा राजा के स्वागत म घुमावदार शंख बजाथे। वोहर राजा के वो महल के बारे म गीत गाइस जउन हा पूरा-पूरा अंबर मणि ले बने हे, जेकर छत हा साफ पन्ना रत्न ले बने हे अउ फर्स म मोती लगे हे। तब वोहर समुद्र के वो बगीचा के गीत गाइस जिहाँ मूंगा के बने बड़े-बड़े पंखामन डोलत रहिथें, मछलीमन हा उहाँ चांदी के चिरईमन कस दिनभर येती ले वोती दंउड़त रहिथें, एनिमोन मन बड़े-बड़े चट्टान ले चिपके रहिथें अउ पींयर धारदार रेत में गुलाबी रंग के फूल फूले रहिथें। वोहर बड़े-बड़े वो मछलीमन के घला गीत गाइस जउनमन उत्तर दिशा के समुद्र ले आथें अउ जिंकर पंखमन म नोकदार बरफ के परत चढ़े रहिथे। अउ वोहर समुद्री अप्सरा सायरन के गीत गाइस जउनमन अतना अद्भुत बात बताथें कि जेला सुनके बैपारीमन हा अपन कान म मोम भर लेथें, ये डर के मारे कि कहूँ उंकर बात म मोहाके वोमन पानी म कूदके मर झन जांय। वोहर समुद्र म डूबे वो जहाजमन के गीत गाइस जिंकर मस्तूलमन अभी घला खड़े हें जिहाँ नाविकमन बरफ बनके डोरीमन म चिपके खड़े हें अउ मैकेरल मछरीमन जहाज के खिड़की डहर ले वोकर बाहिर-भीतर आवत-जावत रहिथें। वोहर वो छोटे-छोटे समुद्री जीव बार्नेकल के बारे म गीत गाइस जउनमन दूर-दूर के यात्रा करइया यात्री होथें अउ जहाजमन के बाहरी हिस्सा म चिपक के दूर देश के यात्रा करके आ जाथें।
वोहर समुद्री जीव नॉटिलस के गीत गाइस जिंकर कना ओपेल रत्न के बने खुद के डोंगा होथे, जउन म रेशम के पाल बंधाय रहिथे। वोहर वो हँसमुख समुद्री मरदमन के गीत गाइस जउनमन वीणा बजाथें अउ अपन मधुर संगीत सुना के समुद्री राक्षस क्रेकेन ला घला सुता देथें। वोहर छोटे-छोटे लइकामन के गीत गाइस जउनमन डाल्फिन ल पकड़के, वोकर पीठ म सवार होके, खुश होके खेलथें। वोहर समुद्री अप्सरामन के गीत गाइस जउनमन समुद्र के सफेद झाग म लेट के आराम करत रहिथें अउ नाविकमन ला देखके उंकर कोती अपन हाथ ले इशारा करके वोमन ला ललचाथें। वोहर बड़े-बड़े टेड़गा दांतवाले समुद्री बघवामन के गीत गाइस अउ लहसदार अयाल वाले समुद्री घोड़ामन के गीत गाइस।
जब वोहर गीत गावय तब समुद्र के विचित्र-विचित्र मछरीमन वोला सुने बर आ जावंय। तब जवान मछुआरा हा अपन जाल फेंकके वोमन ला पकड़ लेवय। बड़े मछरीमन ला अपन भाला म गोभके मार डालय। जब वोकर डोंगा ह मछरी ले भर जातिस तब जलपरी हा वोकर कोती देख के मुसका देतिस अउ गहुरी समुद्र म वापिस समा जातिस।
फेर वोहर जवान मछुआरा के अतका नजीक कभू नइ आतिस कि वोहर वोला छू सकतिस। जवान मछुआरा हा वोला अपन नजीक बुलातिस फेर वोहर नइ मानतिस। जब कभू वोहर वोला पकड़े के कोशिश करतिस तब वोहर कोनो सील मछली के समान पानी म डुबकी लगा देतिस अउ वो दिन वोहर दुबारा लहुट के अउ नइ आतिस।
जइसे जइसे दिन बीतत गिस, जवान मछुआरा हा वोकर गीत म मोहावत गिस। वोकर आवाज हा अतका मधुर रिहिस कि मछुआरा हा मछरी पकड़े बर भुलाके विहिच ल सुनत रहितिस। वोहर मछरी पकड़े के सबो हुशियारीमन ला घला भुला गिस। सोन के आँखी वाले सुंदर-सुंदर मछलीमन दल के दल वोकर आगू ले तंउरत चल देतिन फेर वो डहर वोकर धियान नइ जातिस। वोकर भाला ह फालतू जिनिस कस डोंगाच म परे रहय। वोकर टुकनीमन जुच्छा के जुच्छा माड़े रहितिन। वोहर जलपरी के गीतमन ला हैरान होके सुनत चुपचाप अपन डोंगा म बइठेच रहितिस अउ वोला टकबांध के तब तक देखत रहितिस जब तक समुंदर म धुंधरा नइ छा जातिस अउ चंदा के अंजोर म वोकर सांवला बदन हा चांदी कस चमके नइ लगतिस।
एक दिन वोहर जलपरी ला बलाइस अउ किहिस, ’’जलपरी! मोर मयारुक नन्हीं जलपरी, मंय हा तोर ले अघात मया करथंव। मोला अपन जीवन साथी बना ले ना। मंय हा तोर बिना नइ रहि सकंव।’’
फेर जलपरी हा इनकार म अपन मुड़ी ला डोला दिस। वोहर जवाब दिस, ’’तोर भीतर इंसानी आत्मा रहिथे। अगर तंय हा वोला अपन ले दुरिहा कर देबे तभे मंय हा तोर ले प्यार कर पाहूँ।’’
तब मछुआरा हा मनेमन सोचिस, ’मोर आत्मा हा मोर का काम के? न तो मंय हा येला देख सकंव, न येला छू सकंव अउ येला मंय हा जानंव तको नहीं। मंय हा जब खुदे येला अपन ले अलगा देहूँ, तब मोला मोर खुशी हा मिलही।’ खुशी के मारे वोकर मुँहू ले चीख निकल गिस। वोहर अपन सजे-धजे डोंगा म खड़ा होगिस अउ अपन बांहामन ला फैला दिस। ’’मंय हा अपन आत्मा ला अलगा दुहूँ’’ वोहर जोर से चिल्लाके किहिस, ’’अउ तब तो तंय हा मोर दुल्हन बनबे? अउ मंय हा तोर दुल्हा बनहूँ। हम दुनों झन गहुर समुद्र म एक संग रहिबोन। तंय हा अपन गीतमन म जिंकर बारे म गाय हस वो सब ला मोला देखाबे अउ मंय हा तोर हर इच्छा ला पूरा करहूँ। हम दुनों कभू नइ अलगावन।’’
मछुआरा के गोठ ला सुनके नन्हीं जलपरी हा खुश होके मुसका दिस अउ लजा के अपन मुँहू ला अपन हथेलीमन म छुपा लिस।
’’फेर अपन आत्मा ल मंय हा अपन ले अलगाहूँ कइसे?’’ जवान मछुआरा हा पूछिस, ’’मोला कोनो उपाय बता, तब मंय हा वइसनेच करहूँ।’’
’’हाय! मंय घला तो नइ जानंव।’’ नन्हीं जलपरी हा किहिस, ’’समुद्र म रहवइयामन कना आत्मा नइ होवय।’’ अउ वोहर वोला उदास होके देखिस अउ पानी के भीतर चल दिस।
दूसर दिन बिहिनिया, सूरज हा पहाड़ी ऊपर हाथभर ऊपर चढ़तिस तेकर पहिलिच, जवान मछुआरा हा पादरी के घर गिस अउ वोकर कपाट के संकरी ला तीन घांव बजाइस
एक झन नवसिखिया आदमी हा खिड़की डहर ले झांक के वोला देखिस, वोला पहिचानिस अउ दरवाजा के संकरी ला खोल दिस। किहिस, ’’भीतर आ जाव।’’
जवान मछुआरा हा भीतर गिस, फर्स म बिछे खुशबूदार घांस म मड़िया के बइठ गिस अउ पादरी ले किहिस, जउन हा वो समय एक पवित्र ग्रंथ पढ़त रिहिस, ’’फादर! मोला एक समुद्री जलपरी ले प्यार हो गे हे अउ मोर आत्मा हा वोकर से मिले के मोर इच्छा म बाधा बनत हे। मोला बताव कि मंय हा अपन आत्मा ला अपन ले अलग कइसे करंव? अउ सच कहंव ते मोला येकर कोनो जरूरत घला नइ हे। मोर आत्मा हा मोर का काम के हे? मंय हा येला देख नइ सकंव, छू नइ सकंव अउ येला जानंव तको नहीं।’’
पादरी हा अपन छाती ला पीटिस अउ जवाब दिस, ’’हाय! हाय! तंय हा पागल हो गे हस कि कोनो नशीली जड़ी-बूटी खा लेय हस? आत्मा तो इंसान के सबले जादा पवित्र अंश होथे जउन ला ईश्वर हा हमला नेक काम करे खातिर, नेकी के रद्दा ला पहिचाने खातिर देय हे। संसार म इंसानी आत्मा ले जादा कीमती अउ कोनो दूसर चीज नइ होवय। येहर दुनिया के सब सोना ला मिलाके घला जादा कीमती हे, यहाँ तक कि राजामन के खजाना म मौजूद माणिक ले घला जादा अनमोल हे। तब मोर कहना हे बेटा! तंय हा येकर बारे म सोचना बंद कर दे काबर येहर एक अइसन पाप हरे जउन ला कभू छिमा नइ करे जा सके। अउ जिहाँ तक समुद्र म रहवइया जीवमन के बात हे, वोमन तो नासमझ होथें अउ उंकरमन ले रिश्ता जोड़ने वाला इंसान हा घला भटक जाथे। वोमन तो मैदान म रहने वाला वो जानवर समान होथें जउनमन ला भला-बुरा के कोनो ज्ञान नइ रहय। प्रभु हा उंकरमन खातिर अपन प्राण ला नइ देय हे।’’
पादरी के कठोर वचन सुनके जवान मछुआरा के आँखींमन म आँसू आ गिस। वोहर उठिस अउ किहिस, ’’फादर! वन देवता हा जंगल म रहिथे अउ बड़ा खुश रहिथे। समुद्र के चट्टानमन के बीच रहवइया जल मानवमन अपन लाल सोना के वीणा बजावत बइठे रहिथें। मोर बिनती हे, महूँ ला इंकरेमन जइसे बना दे काबर कि उंकर जीवन हा फूलमन के समान सुंदर अउ झणभंगुर होथे। अउ रहि गे मोर आत्मा के बात? तो येकर ले मोला का फायदा जउन हा मोर अउ मोर मयारुक जलपरी के प्यार के बीच बाधा बने खड़े हे।’’
पादरी हा अपन आँखीमन ला सिंकोड़िस अउ किहिस, ’’देह ले देह के प्रेम घिनौना होथे। अउ ये विधर्मी जीव, जउनमन ला ईश्वर हा खुल्ला घूमे-फिरे के छूट देय हे, वहूमन घिनौना अउ बुरा होथें। जंगल के देवता अउ समुद्र के वो गवइयामन ला धिक्कार हे। मंय रात के समय वोमन के गीत ला सुने हंव; वोमन मोला ईश्वर के प्रार्थना करे ले अउ माला फेरे ले भटकाय के कोशिश करथें। वोमन मोर घर के खिड़कीमन ला बजाथें अउ मोला देखके हाँसथें। वोमन मोर कान म फुसफुसाके अपन पाप ले भरे आनंद के कहानी सुनाथें। मोला नाना भांति के लालच देथें अउ जब मंय हा प्रार्थना करे बर बइठथंव तब वोमन मोर मजाक उड़ाथें। मंय हा तोला कहिथंव, वोमन भटक चुके हें, पूरा-पूरा भटक चुके हें। उंकर खातिर न तो स्वर्ग हे अउ न नरक हे। वोमन कहुँचो ईश्वर के नाम के गुणगान नइ करंय।’’
जवान मछुआरा हा किहिस, ’’फादर! आप नइ जानव कि आप का कहत हव। एक घांव मोर जाल म एक राजा के बेटी हा फंस गे रिहिस। वोहर सुकवा चंदैनी ले घला जादा सुंदर अउ चंदा ले घला जादा गोरी हे। वोकरे तन ला पाय खातिर मंय हा अपन आत्मा ला देना चाहथंव अउ वोकर प्यार खातिर मंय हा स्वर्ग के घला त्याग कर सकथंव। आपसे मोर प्रार्थना हे कि मोला शांति के साथ जावन दव।’’
पादरी हा चिल्ला के किहिस, ’’दूर हट! इहाँ ले भाग। तोर प्रेमिका हा भटक चुके हे अउ वोकर संग तहूँ भटकना चाहत हस।’’ वोहर वोला कोनो आशीर्वाद नइ दिस अउ वोला भगा दिस।
0
तब वो जवान मछुआरा हा बजार कोती निकल गिस। वोकर हिरदे म अनसम्हार दुख भर गे रिहस अउ वोहर मुड़ी नवाके जावत रिहिस।
बेपारीमन जब वोला आवत देखिन तब वोमन आपस म फुसफुसा के गोठियाय लगिन। एक झन हा वोकर नजीक आइस, वोला नाम धर के बलाइस अउ पूछिस, ’’तंय हा का बेंचे बर आय हस?’’
वोहर जवाब दिस, ’’मंय हा इहाँ अपन आत्मा ला बेंचे खातिर आय हंव। कृपा करके येला आप खरीद लव, काबर कि मंय हा येकर ले तंग आ चुके हंव। मोर आत्मा हा मोर कोन काम के हे? न तो मंय हा येला देख सकंव, न छू सकंव अउ न येला समझ सकंव।’’
बेपारीमन वोकर खिल्ली उड़ाइन अउ किहिन, कोनो इंसान के आत्मा हा हमर का काम के? ये तो चांदी के एक ठन कण के बराबर नइ होय। तंय हा अपन शरीर ल हमला गुलाम के रूप म बेच दे। हम तोला शाही बैंगनी कपड़ा पहिनाबोन। तोर अंगरीमन म अंगूठी पहिराबोन अउ तोला महान रानी के खास सेवक बना देबोन। फेर आत्मा के बात झन कर, काबर कि हमर कना येकर कोनो मोल नइ हे अउ न येहर हमर कोनो काम के हे।’’
जवान मछुआरा हा मनेमन सोचिस, ’’कितना अजीब बात हे? फादर हा कहिथे कि आत्मा हा दुनिया म सोना अउ माणिक ले घला जादा कीमती हे अउ ये बैपारीमन कहिथे कि येहर चांदी के एक कण के बराबर घला नइ हे।’’ वोहर बजार ले निकलके समुद्र तट कोती चल दिस। अउ सोचे लगिस कि वोला अब का करना चाही।
मंझनिया बेरा वोला अपन एक संगवारी के सुरता अइस जउन हा समुद्र किनारे म उगने वाला जड़ी-बूटी इकट्ठा करय। वोहर वोला एक जवान चुड़ैल के बारे म बताय रिहिस। चुड़ैल हा खाड़ी के नजीक एक गुफा म रहय अउ जादू-टोना करे म उस्ताद रिहिस। वोला आत्मा ले छुटकारा पाय के अतका जल्दी रिहिस कि वोहर तुरते वोकर गुुफा डहर दंउड़ गिस।
समुद्र के किनारा म दंउड़त समय धुर्रा उड़े लगिस। चुड़ैल ला अपन हथेलीमन म खुजली महसूस होइस। तब वोहर समझ गिस कि कोनो आवत हे। वोहर हाँसिस अउ अपन लाल-लाल चुंदीमन ला छरिया दिस अउ गुफा के मुहाटी म खड़े हो गिस। वोहर हाथ म जंगली हेमलाक नाम के पौधा के डारा धरे रिहिस जउन म फूल फूले रिहिस।
’’तोला का होना? का होना तोला?’’ वोहर चिल्ला के पूछिस, जब जवान मछुआरा हा हफरत-हफरत पहाड़ी के सोझ चढ़ाई चढ़के वोकर गुफा के मुहाटी म वोकर अगू पहुँचिस अउ वोकर आगू मुड़ी नवा के खड़ा होइस। ’’जब हवा हा खराब हे तब तंय हा अपन जाल म मछरी खोजत हस? मोर कना नरकट के एक ठन छोटे असन बांसुरी हे। वोला बजाय ले मुलेट मछरीमन तंउरत ये खाड़ी म आ जाथें। फेर येहर बड़ महंगी हे। तोला का होना? तोला का चाही? का तोला अइसन तूफान चाही जउन हा जहाजमन ला तहस-नहस कर देय अउ वोमा के कीमती खजाना वाले संदूकमन ला बोहा के किनारा तक ले आय? मोर कना हवा ले घला जादा ताकत वाले तूफान हे। काबर कि मंय हा वोकर सेवा करथंव जउन हवा ले घला जादा ताकतवर होथे। एक चलनी अउ एक बाल्टी पानी के मदद से मंय हा बड़े-बड़े जहाजमन ला घला समुद्र म डुबा सकथंव फेर येकर कीमत हे। प्यारे जवान! येकर एक कीमत हे। तोला का होना, बता? मंय हा अइसन फूल के बारे म जानथंव जउन हा घाटी म फूलथे अउ मोर सिवा वोकर बारे म कोनो हा नइ जाने। वोकर पत्तामन बैंगनी रंग के होथें जेकर बीच म चंदैनी सरीख एक ठन निशान रहिथे अउ वोकर रंग हा दूध के समान सफेद होथे। यदि तंय हा ये फूल ला रानी के ओंठ म छुआ देबे तब वोहर तोर पीछू-पीछू दुनिया भर घूमही। राजा के पलंग ला छोड़के वोहर तोरेच पीछू-पीछू घूमही। फेर येकरो एक कीमत हे, प्यारे! येकरो एक कीमत हे। तोला का चाही? तोला का होना? मंय हा एक मेचका ल ओखली म कूटके वोकर शोरबा बना सकथंव अउ वो शोरबा ले मरे इंसान के हाथ ला घला चला सकथंव। येला कहूँ अपन सुते दुश्मन के ऊपर छींच देबे तब वोहर जहरीला कालिया नाग बन जाही अउ वोकर सगी माँ हा घलो वोला मार डारही। एक चक्का के मदद ले मंय हा चंदा ला अगास ले खींच के धरती म ला सकथंव अउ चमकत कांच के एक टुकड़ा म तोला मौत ला दिखा सकथंव। तोला का होना, बोल? तोला का चाही? मोला अपन इच्छा बता, मंय हा तोर हर इच्छा ला पूरा कर सकथंव फेर तोला येकर कीमत चुकाय बर पड़ही। प्यारे, तोला येकर कीमत चुकाय बर पड़ही।’’
वो जवान मछुआरा हा किहिस, ’’मोर तो बस एके ठन छोटे से इच्छा हे। तभो ले पादरी हा मोर ले नाराज हो गिस अउ मोला अपन घर ले निकाल दिस। ये तो बस छोटे से बात रिहिस फेर बैपारीमन तो मोर खिल्ली उड़ाइन अउ मोला भगा दिन। येकरे सेती मंय हा अब तोर कना आय हंव। भले लोग-बाग तोला खराब कहिथें। जउन घला तोर कीमत होही मंय हा वोला चुकाहूँ।’’
’’तब तोला का होना?’’ चुड़ैल हा वोकर नजीक आके पूछिस।
’’मंय हा अपन आत्मा ला खुद से अलग करना चाहथंव।’’ जवान मछुआरा हा किहिस।
चुड़ैल के चेहरा हा पिंयरा गिस। वोहर कांप गिस। अपन चेहरा ला नीला लबादा से ढंक लिस। ’’मयारुक जवान! मयारुक जवान,’’ वोहर बुदबुदाइस, ’’येहर तो बहुत भयानक काम हरे।’’
मछुआरा हा अपन घुंघरालू बाल ला झटकिस अउ हाँस दिस। ’’मोर आत्मा हा मोर कोनो काम के नइ हे,’’ वोहर किहिस, ’’मंय हा वोला देख नइ सकंव, वोला छू नइ सकंव अउ वोला मंय हा जानंव तक नहीं।’’
’’मंय हा तोला येेर सब उपाय बता देहूँ तब तंय हा मोला का देबे?’’ चुड़ैल हा अपन सुंदर आँखी ले वोला देखत पूछिस।
’’सोना के पांच सिक्का।’’ वोहर किहिस, ’’अउ वो फूल के घर जिहाँ मंय हा रहिथंव, अउ वो रंगीन डोंगा जेमा मंय हा समुद्र म जाथंव। बस, मोला वो तरकीब बता दे जेकर ले मंय हा अपन आत्मा ले छुटकारा पा सकंव। अउ मोर कना जउन होही वो सब तोला दे देहूँ।’’
चुड़ैल हा वोला ताना मारत वोकर ऊपर हाँसिस। हेमलॉक (एक जहरीला पौधा) के डारा म वोला मारिस, ’’मंय हा पतझड़ के पत्तामन ला सोना म बदल सकथंव,’’ वोहर किहिस, ’’अउ चाहंव ते चंदा के अंजोर ले चांदी के चद्दर बना सकथंव। जेकर मंय हा सेवा करथंव वोहर ये दुनिया के सबो राजा ले जादा अमीर हे अउ दुनिया के सबो राज हा वोकरेच हरे।’’
’’तब फेर मंय हा तोला का देवंव?’’ वोहर चिल्ला के किहिस, ’’अगर तोर कीमत सोना अउ चांदी ले नइ चुकाय जा सके?’’
चुड़ैल हा अपन नाजुक हाथ ले वोकर चूंदी ला सहलाइस, ’’तोला मोर संग नाचे बर पड़ही, मयारुक जवान। वोहर आस्ते ले किहिस अउ मुसका दिस।
’’बस अतकच?’’ जवान मछुआरा हा हैरान होके किहिस अउ खड़ा हो गिस।
’’हाँ,’’ येकर ले जादा कुछू नइ।’’ चुड़ैल हा किहिस अउ फिर से मुसका दिस।
’’तब फिर सांझ होय के बाद हम कोनो गुप्त जघा म नाचबोन।’’ मछुआरा हा किहिस, ’’नाच खतम होय के बाद तंय हा मोला वो तरकीब बता देबे जउन ला मंय हा जानना चाहत हंव।’’
चुड़ैल हा अपन मुड़ी ला डोलाइस, ’’पुन्नी के रात में, जब चांद हा पूरा गोल होही।’’ वोहर टुड़बुड़ा के किहिस। तब वोहर चारों मुड़ा देखिस, घ्यान लगा के सुनिस। नीला रंग के एक ठन चिरई हा अपन खोंधरा ले उड़िस, अउ रेती के टीला ऊपर चक्कर लगाय लगिस। विहिंचे धब्बेदार पंख वाले तीन ठन चिरईमन स्लेटी घांस के बीच सरसरावत एक-दूसर ला सीटी बजा के बलाइन। उहाँ येकर सिवा अउ कोनो आवाज नइ आवत रिहिस। चुड़ैल हा अपन हाथ ला आगू बढ़़़़ाइस, वोला अपन नजीक खींचिस, अउ अपन सुखाय ओंठमन ला वोकर कान म टेंका दिस।
चुड़ैल हा धीरे से किहिस, ’’आज रात तोला पहाड़ के टीप मा आय बर पड़ही। आज सब्त (पवित्र दिन) हे। अउ वहू हा उहाँ आही।’’
जवान मछुआरा हा हड़बड़ा गिस अउ वोकर कोती देखे लगिस।
वोहर अपन सफेद दांतमन ला देखावत हाँसे लगिस।
मछुआरा हा पूछिस, ’’तंय हा काकर आय के बात करत हस?’’
चुड़ैल हा जवाब दिस, वोकर ले कोनो फरक नइ पड़े। तंय हा आज रात आबे। आबे तब हार्नबीम पेड़ के खाल्हे खड़ा होबे अउ मोर आय के अगोरा करबे। कहूँ कोनो करिया कुकुर हा तोर नजीक आय के कोशिश करही तब वोला तंय हा विलो पेड़ के डारा म मारबे। वोहर भाग जाही। कोनो घुघवा हा तोर ले कुछू पूछही तब तंय हा वोला कोनो जवाब झन देबे। जब चंदा हा पूरा गोल हो जाही तब मंय हा आहूँ अउ घांस ऊपर हम दुनों झन संघरा नाचबोन।’’
’’फेर कसम खाके तंय हा मोला बता कि मय हा अपन आत्मा ला अपन शरीर ले अलग कइसे कर सकहूँ,’’ मछुआरा हा पूछिस।
वोहर धूप म निकलिस। हवा म वोकर लाल चूंदीमन लहराय लगिन। वोहर किहिस, ’’मंय हा छेरी के खुरमन के कसम खाके कहत हंव।’’
जवान मछुआरा हा खुशी के मारे चिल्ला के किहिस, ’’तंय हा सब चुड़ैल ले अच्छा चुड़ैल हरस। आज रात मंय हा पहाड़ के टीप म जरूर तोर संग नाचहूँ। काश तंय हा मोर ले सोना-चांदी मांगे रहितेस। फेर तंय हा जउन कीमत मांगत हस वोहर तोला मिल जाही। काबर, ये तो बहुत मामूली बात हरे।’’ वोहर अपन टोपी ला उतारिस, मुड़ी नवाइस, अउ भारी खुश होके वापिस शहर कोती दंउड़ गिस।
चुड़ैल हा वोला जावत देखत रिहिस। जब वोहर दिखना बंद हो गिस तब वोहर अपन गुफा भीतर गिस। देवदार लकड़ी के बनल एक ठन संदूक ले दर्पण निकालिस। वोला एक ठन चौखटा म टेका के खड़ा करिस। वोकर आगू कोयला के अंगरा म ’वर्वेन’ (जड़ी-बूटी, धूप) जलाइस। वोकर धुंगिया के छल्ला के बीच झांक के देखिस अउ गुस्सा म मुट्ठी बांध के चिल्लाइस, ’’वोला तो मोर होना चाही। मंय घला तो वोतकाच सुंदर हंव।’’
सांझ होय के बाद अगास म जब चंदा ऊ गिस तब जवान मछुआरा हा पहाड़ के चोटी म चढ़िस अउ ’हार्नेबीम’ पेड़ के डारामन के खाल्हे जाके खड़ा हो गिस। वोकर खाल्हे समुद्र हा कोनो चमकदार धातु के ढाल बरोबर छितरे रिहिस। छोटे से ये खाड़ी म मछरी पकड़े के डोंगामन के परछाईंमन हालत-डोलत रिहिन। पींयर गंधक जइसन रंग के आँखी वाले एक ठन घुघवा हा वोकर नाम धरके वोला बलाइस फेर वोहर कोनो जवाब नइ दिस। एक ठन करिया रंग के कुकुर हा वोकर डहर हबकिस अउ गुर्राइस; वोहर विलो पेड़ के डारा में वोला मारिस तब वो कुकुर हा कुं कुं करत उहाँ ले भाग गिस।
आधा रात होइस तब बहुत अकन चुड़ैल मन चमगेदरी समान हवा म उड़त उहाँ आइन। जमीन म पांव धरतेच वोमन चिल्लाइन, ’’अरे! इहाँ कोनो अइसे हे जउन ला हमन नइ जानन।’’ वोमन येती-वोती सूंघिन, आपस म बात करिन अउ इशारा करिन। सबले आखिर म वो नौजवान चुड़ैल हा आइस जेकर चूंदीमन हवा म उड़त रिहिन। वोहर सुनहरा रंग के कपड़ा के पोशाक पहिरे रिहिस जउन म मयूर के पींयर आँखी के डिजाइन बने रिहिस। वोकर सिर म मखमली कपड़ा के एक छोटकुन टोपी रिहिस।
’’वोहर कहाँ हे? वोहर कहाँ हे?’’ वोला देख के चुड़ैल हा चिल्लाइस। हाँसिस अउ दंउड़त हार्नेबिम पेड़ के खाल्हे आ गिस। वोहर नौजावन मछुआरा के हाथ ल धरके वोला चंदा अंजोर म लाइस अउ वोकर संग नाचे लगिस।
वोहर गोल-गोल घूमे लगिस। वो जवान चुड़ैल हा अतका ऊँचा छलांग लगाइस कि वोकर जूता के लाल एड़ीमन मछुआरा ला दिखे लगिस। तभे नचइयामन के नजीक घोड़ा के हिनहिनाय के आवाज आइस। फेर उहाँ एको घोड़ा नइ रिहिस जेकर कारण मछुआरा हा डर्रा गिस।
’’अउ जोर से नाच,’’ चुड़ैल हा चिल्लाइस। वोहर अपन बांहामन ल मुछुआरा के नरी के चारों मुड़ा कंसके लपेट लिस। वोकर गरम सांस हा मछुआरा ला अपन चेहरा म महसूस होय लगिस। ’’अउ तेज, अउ तेज,’’ वोहर फेर चिल्लाइस। मछुआरा ल चक्कर आय लगिस। वोकर दिमाग हा चकराय लगिस। वोहर एकदम डर गिस। वोला लगिस कि दुरिहा ले वोला कोनो दुष्ट जीव हा देखत हे। तभे वोहर एक चट्टान के छंइहा म कोना ला खड़े देखिस जउन हा पहिली उहाँ नइ रिहिस।
उहाँ एक आदमी रिहिस जउन हा स्पेनिश डिजाइन के करिया रंग कं मखमली शूट पहिने रिहिस। वोकर चेहरा हा अजीब ढंग के, पींयर रंग के रिहिस फेर वोकर ओंठमन म घमंड भरे दिखत रिहिस। वोहर थकेमांदे दिखत रिहिस। अउ बेधड़क पीछू डहर लपकके अपन खंजर के मुठिया संग खेलत रिहिस। वोकर नजीक म घांस ऊपर पंख वाले एक टोपी अउ घुड़सवारी वाले दस्ताना पड़े रिहिन जउन म सुनहरी रंग के बंधनी लगे रिहिन, अउ मोती के अजीब डिजाइन बने रिहिस। वोकर खांद म एकठन छोटे लबादा रिहिस जेकर अंदरूनी भाग म कीमती फर लगे रिहिन। वोकर मुलायम अउ गोरा हाथ के अंगरीमन म अंगूठी रिहिस। वोकर भारी पलकमन वोकर आँखी म झुके रिहिन। जवान मछुआरा हा वोला एकटक अइसे देखत रिहिस मानो वोहर वोकर जादू म सम्मोहित हो गे होय। आखिरकार उंकर नजर मिलिस, तब वोहर जिहाँ-जिहाँ नाचय, वोला लगय कि वो आदमी हा विहिच ल देखत हे। वोहर चुड़ैल के हँसी के आवाज सुनिस तब वोकर कनिहा ला पागलमन सरीख कंस के पकड़के वोला गोल-गोल घुमाय लगिस।
तभे जंगल म कुकुर के भूंके के आवाज आइस। नाचइयामन रुक गिन। दू-दूझन के दल बनाके वोमन वो आदमी के नजीक गिन अउ वोकर आगू माड़ी के भार बइठके वोकर हाथ ला चूमे लगिन। वो आदमी हा गर्व के मारे मुसकाय लगिस बिलकुल वइसने जइसे कोनो चिरई के पंखमन के पानी म छुए ले पानी के ऊपर लहरा बन जाथे। फेर वोमा तिरस्कार के भाव रिहिस। वोहर जवान मछुआरा ला एकटक देखतेच रिहिस।
’’चल आ, हमूमन प्रार्थना करबोन,’’ चुड़ैल हा धीरे से किहिस अउ वोला धर के ऊपर लेग गिस। मछुआरा हा मोहाय कस वोकर पीछू-पीछू चल दिस। फेर जब वोहर वोकर नजीक पहुँचिस तब अकस्मात वोहर अपन छाती म सलीब के निशान बनाय लगिस अउ पवित्र नाम के सुमिरन करे लगिस।
वोकर अइसन करते भार चुड़ैलमन चीखत-चिल्लावत उड़ गिन अउ पींयर चेहरा वाला वो आदमी जउन हा वोला देखत रिहिस, दरद के मारे अइंठ गिस। वोहर जंगल कोती भागिस अउ सीटी बजाइस। चांदी के साजसमान ले सजे एक घोड़ी वोकर नजीक आइस। वोहर कूद के घोड़ी ऊपर सवार हो गिस अउ पीछू मुड़कके उदास भाव ले मछुआरा कोती देखे लगिस।
लाल चूंदीवाले चुड़ैल हा घला उड़े के कोशिश करिस फेर मछुआरा हा वोकर हाथमन ल कंस के पकड़ लिस। वोहर चिल्लाइस, ’’मोला जावन दे, मोला जावन दे। तंय हा वोकर सुमिरन करे हस जेकर नाव नइ लेना रिहिस। अउ अपन छाती म वो चिनहा बनाय हस जइसन नइ बनाना रिहिस।’’
’’नहीं, जब तक तंय हा मोला वो रहस्य के बात ला नइ बताबे मंय हा तोला नइ छोड़ंव,’’ मछुआरा हा किहिस।
चुड़ैल हा कोनो जंगली बिलई कस वोकर संग हाथापाई करे लगिस अउ वोकर झाग ले भरे ओठमन ला चाबत किहिस, ’’कोन से रहस्य के बात?’’
मछुआरा हा किहिस, ’’तंय वोला जानत हस।’’
वोकर घांस कस हरियर आँखीमन आँसू म भर गिस। नजर हा धुंधरा गिस। तब वोहर मछुआरा ले किहिस, ’’मोर ले कोनो दूसर जिनिस मांग ले फेर वोला झन पूछ।’’
मछुआरा हा हाँसिस अउ वोला अउ कंस के पकड़ लिस।
जब चुड़ैल हा खुद ला छोड़ाय म लाचार हो गिस तब वोहर फुसफुसा के किहिस, ’’महूँ हा तो समुद्र के बेटीमन के समान सुंदर हंव। जलपरी समान जवान हंव।’’ वोहर वोला रिझाय के गजब कोशिश करिस। अपन चेहरा ला वोकर चेहरा म टेका दिस।
फेर मछुआरा हा अपन भौंहमन ला सिंकोड़त वोला पीछू ढकेल दिस। अउ किहिस, ’’अगर तंय हा मोर संग करे अपन वादा ला नइ निभाबे ते मंय हा तोला नकली चुड़ैल समझ के तोर प्राण ले लेहूँ।’’
वोकर चेहरा हा जुडास पेड़ के फूल सरीख पींयर-राख जइसे हो गिस अउ वोहर कांपे लगिस। वोहर कांपत-कांपत किहिस, ’’ठीक हे। वोहर तोर आत्मा हरे, मोर नहीं। तंय वोकर संग चाहे जइसे कर।’’ फेर वोहर अपन कमरबंद ले छोटकुन छुरी निकालिस, जेंकर मूठ म हरियर करैत सांप के चमड़ा के खोल लगे रिहिस अउ वोला मछुआरा ला दे दिस।
मछुआरा हा हैरान होके पूछिस, ’’येहर मोर का काम आही?’’
वोहर पलभर चुप रिहिस, वोहर डर के मारे कांपत रिहिस, फेर अपन माथ के चूंदीमन ला पीछू कोती सलटावत, अजीब ढंग ले मुसकावत किहिस, ’’जउन ला लोगन शरीर के परछाईं कहिथें, असल में वोहर शरीर के परछाईं नहीं बल्कि आत्मा के शरीर होथे। तंय हा जा समुद्र के तट म अउ चंदा कोती पीठ करके खड़े हो जाबे अउ तोर जउन परछाईं बनही, जउन हा तोर आत्मा के शरीर होही, वोला अपन गोड़ तीर ले कांट के अलग कर देबे। तब फेर अपन आत्मा ले कहिबे कि वोहर तोला छोंड़ के चले जाय। अउ वोहर तोला छोंड़ के चले जाही।’’
चुड़ैल के बात ला सुनके जवान मछुआरा हा कांप गिस। धीरे से किहिस, ’’का तंय सच कहत हस?’’
’’बिलकुल सच कहत हंव। काश, मंय हा तोला ये बात ला नइ बतातेंव।’’ चुड़ैल हा रोवत-रोवत किहिस अउ मछुआरा के गोड़ म लिपट गिस।
मछुआरा हा वोला ढकेल के अपन ले दुरिहा करिस, वोला विही कना घांस म छोड़ दिस, पहाड़ कना जाके छुरी ला अपन कमर म खोंचिस अउ खाल्हे उतरे लगिस।
तब वोकर भीतर मौजूद वोकर आत्मा हा वोला पुकारिस, ’’देख, मंय हा अतका बरस तोर संग तोर शरीर म रेहेंव, तोर सेवा करेंव, अब मोला तंय हा अपन ले अलगा झन। मंय हा तोर का अनभल करे हंव?’’
जवान मछुआरा हा हाँस दिस। ’’तंय हा मोर कोनो अहित नइ करे हस, फेर अब मोला तोर कोनो जरूरत नइ हे,’’ वोहर किहिस। ’’दुनिया हा बहुत बड़े हे, इहाँ सरग घला हे अउ नरक घला, अउ ये दुनों के बीच म धुंधरहा कस जघा घला हे, तोर मर्जी, तंय जिहा चले जा फेर तंय हा मोला परेशान झन कर। काबर कि मोर मयारुक हा मोला बलावत हे।’’
वोकर आत्मा हा वोकर गजब अर्जी-बिनती करिस फेर वोहर वोकर एको बात नइ सुनिस। वोहर जंगली बोकरा कस छलांग मारत खाल्हे उतरिस, बराबर धरती म पहुँचिस, अउ समुद्र के सुनहरा तट म पहुँच गिस।
कोनो युनानी मूर्तिकार के बनावल मूर्ति के समान वोहर गठीला बदनवाले जवान रिहिस। वोहर चंदा कोती पीठ करके खड़ा हो गिस। तभे समुद्र के सफेद फेन ले कुछ सफेद हाथ बाहिर निकलिन अउ वोला बलाय लगिन। लहरामन के बीच कुछ धुंधरा आकार निकलिन अउ वोला प्रणाम करे लगिन। वोकर आगू वोकर परछाईं पड़े रिहिस जउन हा असल म वोकर आत्मा के शरीर रिहिस। वोकर पीठ पीछू सोन के समान चंदा हा हवा म झूलत रिहिस।
तब वोकर आत्मा हा वोकर ले फेर किहिस, ’’देख, तंय हा मोला अपन ले अलगानच चाहत हस तब मोला बिना हिरदे के झन अलगा। ये दुनिया हा बहुत कठोर हे, अपन हिरदे ला मोला दे दे ताकि मंय हा वोला अपन संग रख सकंव।’’
वोहर अपन मुड़ी ला झटकारिस अउ मुसकाइस, किहिस, ’’अगर मंय हा अपन हिरदे ला तोला दे देहूँ तब अपन मयारुक संग प्यार कइसे कर सकहूँ?’’
’’नहीं! मोर ऊपर तनिक दया कर,’’ वोकर आत्मा हा किहिस, ’’मोला अपन हिरदे ला दे दे, काबर कि ये निरदयी दुनिया ला देखके मोला डर लागत हे।’’
’’मोर हिरदे हा तो मोर मयारुक बर हरे,’’ वोहर जवाब दिस, ’’इही पाय के तंय हा इहाँ अउ झन बिलम, जल्दी जा।’’
’’का महूँ ला प्यार करे के हक नइ हे?’’ वोकर आत्मा हा पूछिस।
’’अब भाग इहाँ ले, मोला तोर कोनो जरूरत नइ हे,’’ जवान मछुआरा हा किहिस। तब वोहर हरियर करैत सांप के चमड़ी के मुठवाला चाकू ला निकालिस अउ अपन पंवरी के नजीक ले परछाईं ला काटके अलग कर दिस। परछाईं हा उठ के खड़ा हो गिस अउ वोला देखे लगिस। वोहर बिलकुल वोकरेच जइसे रिहिस।
वोहर पीछू घुंच गिस अउ चाकू ला अपन बेल्ट म खोंस लिस। वोकर मन मा एक अजीब डर समा गिस। ’’इहाँ ले भाग जा,’’ वोहर धीरे ले किहिस, ’’अउ दुबारा मोला अपन सूरत झन देखाबे।’’
’’नहीं, हमला फिर से एक होना पड़ही,’’ आत्मा हा किहिस। वोकर आवाज हा मद्धिम अउ बांसुरी जइसे रिहिस, अउ बोलत समय वोकर ओंठमन हालत घला नइ रिहिन।
’’हम दुबारा कइसे मिलबोन, का तंय हा मोर संग समुद्र के भीतर जा सकथस?’’ जवान मछुआरा हा किहिस।
’’हर साल एक घांव मंय हा ये जघा मा आहूँ अउ तोला बुलाहूँ,’’ आत्मा हा किहिस, ’’हो सकथे तोला मोर जरूरत पड़ जाय।’’
’’मोला तोर का जरूरत पड़ही?’’ जवान मछुआरा हा किहिस, ’’फेर ठीक हे, जइसे तोर मर्जी।’’ अउ वोहर पानी म कूद गिस। तब ट्राइटन नामक जीव हा अपन सींग ला बजाइस। वो नन्हीं जलपरी हा वोकर ले मिलेबर ऊपर आइस। वोहर अपन बांहामन ला वोकर गला म लपेट लिस अउ वोकर ओंठमन ला चूमिस।
0
आत्मा हा वो सुनसान तट म खड़े-खड़े ये सब ल देखतेच रिहिस। अउ जब वोमन समुद्र के भीतर चलदिन तब वोहर रोवत-रोवत दलदली जमीन कोती चल दिस।
एक साल बीते के बाद आत्मा हा विही करा आइस अउ जवान मछुआरा ल पुकारिस। वोहर समुद्र के भीतर ले ऊपर आइस अउ पूछिस, ’’तंय हा मोला काबर बलाय हस?’’
तब आत्मा हा जवाब दिस, ’’मोर नजीक आजा, ताकि मंय हा तोर संग गोठिया सकंव काबर कि मंय बहुत अजीब-अजीब चीज देखे हंव।’’
तब वोहर नजीक आइस, उथला पानी म बइठ गिस, अपन मुड़ी ला अपन हाथ म टेकाइस, अउ सुने लगिस।
आत्मा हा केहे के शुरू करिस, ’’जब मंय हा तोर ले अलगायेंव तब मंय हा पूरब कोती चल देंव। पूरबेच ले ज्ञान के सब बात आथे। मंय हा छै दिन यात्रा करेंव। सातवाँ दिन के बिहिने-बिहिने मंय हा तातार मन के देश के एक ठन पहाड़ी म पहुँचेंव। घाम ले बचे खातिर मंय हा एक ठन अमली पेड़ के छइंहा म बइठ गेंव। जमीन सुक्खा रिहिस अउ गरमी के मारे तपत रिहिस। आदमीमन वो मैदान म अइसे आवत-जवात रिहिन जइसे तांबा के चमकदार तावा ऊपर माछीमन रेंगत होंय।’’
’’मंझनिया होइस तब वो मैदान के एक कोना ले लाल धुर्रा के एक बादल उठिस। तातारमन जब येला देखिन तब वोमन अपन-अपन धनुष-बाण ला संभाल लिन। अपन-अपन छोटे घोड़ामन म कूद के चढ़िन अउ धुर्रा के वो बादल डहर पल्ला दंउड़िन। महिलामन रोवत-गावत झुंझकुर झाड़ीमन कोती भागिन अउ खुद ला मोटा कपड़ामन के परदा म छिपा लिन।’’
’’सांझ होतेच तातारमन वापिस आ गिन फेर वोमे से पांच झन गायब हो गे रिहिन। कतरोमन घायल हो गे रिहिन। वोमन घोड़ामन ला गाड़ी म फांदिन अउ जल्दी-जल्दी उहाँ ले दुरिहा निकल गिन। तब एक गुफा ले तीन ठन सियार निकलिन अउ वोमन ला जावत देखे लगिन। तब वोमन हवा ला सूंघिन अउ जल्दी उल्टा दिशा म दंउड़े लगिन।
रात कुन जब चंदा उगिस तब मंय हा मैदान म एक जघा आगी बरत देखेंव। मंय हा विही कोती चल देंव। उहाँ बैपारीमन के एक दल हा कालीन बिछाके बइठे रिहिस। उंकर ऊँटमन उंकर पीछू कोती बंधाय रिहिन। उंकर नीग्रो नौकरमन रेती म जानवर के खाल के बने तंबू गड़ियावत रिहिन अउ वोकर चारों मुड़ा कांटा वाले ढेंखरा के रूंधना बनावत रिहिन।
मंय हा जइसने उंकर तीर पहुँचेंव बैपारीमन के मुखिया हा उठिस, अपन तलवार ल निकालिस अउ मोला पूछिस, कि तंय हा इहाँ का करत हस।
मंय हा जवाब देंव कि मंय हा अपन देश के राजकुमार हरंव अउ तातारमन के कैद ले भाग के आय हंव। वोमन मोला अपन गुलाम बनाना चाहत रिहिन। मुखिया हा हाँसिस अउ बांस के एक लंबा लउठी म लगे पांच ठन मुड़ी दिखाइस।
तब वोहर पूछिस कि ईश्वर के पैगंबर कोन हरे। मंय हा जवाब देंव, हजरत मोहम्मद।
हजरत मोहम्मद के नाम सुनते साट वोहर अपन मुड़ी ला नवा लिस। मोर हाथ ला पकड़के मोला अपन कना बइठार लिस। एक नीग्रो लड़की हा बर्तन म घोड़ी के दूध अउ मेमना के भूने मांस लेके आइस।
बिहिनिया होत हमन अपन यात्रा शुरू करेन। मंय हा मुखिया के बगल म लाल रूंआवाले एक ऊँट म सवार रेहेंव। आगू-आगू एक झन आदमी हा भाला धरके दंउड़त रिहिस। हमर आजूबाजू सैनिक रिहिन। उंकर पीछू खच्चर रिहिन जउन म समान लदाय रिहिस। वो काफिला म चालीस ऊँट रिहिन। खच्चरमन के संख्या दुगुना यानी कि अस्सी रिहिस।
हमन तातारमन के देश ले निकल के वो देश म पहुँचेन जिहाँ के आदमीमन चंदा ला बखानथें। उहाँ पंख वाले जीव ग्रिफिन-मन चट्टानमन के बीच अपन सोना के खजाना के रखवाली करत रिहिन अउ ड्रैगनमन सुतत रिहिन। जब हमन पहाड़ के ऊपर ले गुजरेन तब हमन अपन-अपन सांस ला थाम लेयेन कि हमर ऊपर बरफ झन गिरे। सब झन अपन-अपन आँखी म जालीदार कपड़ा पहिन लेयेन। जब हमन घाटी लेे गुजरेन तब पिग्मीमन पेड़मन के खोह म लुकाके हमर ऊपर तीर चलाइन।
रात के समय हमन वो जंगली आदमीमन ला ढोल बजावत सुनेन। जब हमन उंकर बेंदरा के खंबा म जाके फल चढ़ायेन तब वोमन हमला कोनो नुकसान नइ पुँचाइन। अउ जब हमन उंकर सांप के खंबा म पहुँचेन तब वोमन हमन ला कांस के कटोरामन म गरम दूध दिन अउ हमन ला जावन दिन। हमन ला अपन पूरा यात्रा म तीन घांव आक्सस नदी हा अभरिस। हमन लकड़ी के डोंगी अउ जानवर के खाल ले बने हवा के बड़े-बड़े थैली के मदद से नदिया ला पार करेन। हमन ला देखके दरियाई घोड़ामन बिदक गिन अउ हमर ऊपर हमला कर दिन। हमर ऊँटमन डर के मारे कांप गिन।
हमन जउन-जउन शहर ला नाहकेन उहाँ के राजामन हमर ले टेक्स वसूल करिन लेकिन हमन ला शहर भीतर नइ आवन दिन। वोमन परकोटा के ऊपर ले हमर बर खाना के टुकनी फेंकिन जेमा रिहिन मंदरस म पके मकई के छोटे-छोटे रोटी अउ खजूर भराय मैदा के मिठाई। हर सौ टुकनी पीछू हमन वोमन ला एंबर के एक-एक मनका देयेन।
गाँव के आदमीमन जब हमला आवत देखिन तब वोमन कुआँमन म जहर मिला दिन अउ पहाड़ कोती भाग गिन। हमन ’मगदाई’ मन संग लड़ाई लड़ेन, वोमन जनम धरथें तब डोकरा होथे अउ हर साल जवान होवत जाथें, अउ छोटे बच्चा बनके मर जाथें। हमन ’लैक्दोई’ मन संग घला लड़ाई लड़ेन। वोमन खुद ला बघवा के औलाद मानथें अउ अपन शरीर म पींयर अउ करिया रंग पोते रहिथें। हमन ’ओरेस्टस’ मन संग घला लड़ाई लड़ेन जउनमन अपन मृतकमन ला पेड़ के फनगी डारामन म दफनाथें अउ खुद अंधियारी गुफामन म रहिथें ताकि उंकर देवता सूरज हा वोमन ला मार झन डारे। तब हमन ’क्रिमेनियन’ मन संग लड़ाई लड़ेन जउनमन मगर के पूजा करथें, वोला हरियर कांच के बाली पहिराथें अउ मक्खन अउ ताजा कुकरी के भोग लगाथें। हमन ’अगाजोनबाई’ मन संग घला लड़ाई करेन जिंकर चेहरा हा कुकुर के मुड़ी समान होथे अउ ’सिबान’ मन संग घलो लड़ेन जिंकर गोड़मन घोड़ा के गोड़ समान होथें अउ वोमन सबले तेज भागथें।
हमर दल के एक तिहाई आदमी लड़ाई म मारे गिन अउ एक तिहाई आदमी भूख-प्यास म मर गिन। बाकी बचे आदमीमन मोर खिलाफ चुगली करिन अउ किहिन कि मंय हा उंकर खातिर अपशकुन बनके आय हंव। मंय हा पथरा खाल्हे ले एक ठन सांप पकड़ेव अउ खुद ला डसा लेंव। जब मोला कुछुच नइ होइस तब वोमन डर्रा गिन।
चार महीना बाद हमन ’इलेल’ शहर पहुँचेन। तब रात के समय रिहिस, हमन शहर के परकोटा के बाहिर एकठन बगीचा म पहुँचेन। हवा म भारी उमस रिहिस काबर कि तब चंदा हा वृश्चिक राशि म चलत रिहिस। हमन पेंड़मन ले पाका-पाका अनार टोरेन, वोला टोर के वोकर मीठ-मीठ रस पीयेन। तब फेर हमन अपन-अपन कालीन बिछा के सुत गेन अउ बिहिनिया होय के अगोरा करे लगेन।
बिहिनिया हमन उठेन अउ शहर के दरवाजा मा जाके वोकर सांकल ला खटखटायेन। दरवाजा हा लाल कांसा के बने रिहिस जेकर ऊपर समुद्री ड्रेगन अउ पंखवाले ड्रेगन के आकृति उंकेरे गे रिहिस। पहरेदारमन परकोटा ले खाल्हे झांकके देखिन अउ हमर आय के कारण पूछिन। हमर दल के दुभाषिया हा जवाब दिस कि हमन सीरिया द्वीप ले आय हन अउ हमन बेपारी हरन। हमर कना बहुत अकन सामान हे। वोमन हमर कुछ संगवारीमन ला बांध लिन अउ किहिन कि दरवाजा ला मंझनिया खोले जाही। तब तक हमन ला उहें अगोरा करे खातिर केहे गिस।
मंझनिया वोमन हमर खातिर दरवाजा ला खोलिन। जइसने हमन भीतर गेयेन लोगबाग अपन-अपन घर ले निकलके हमन ला देखे लगिन। हमर चारों कोती भीड़ जमा हो गिस। शहर म मुनादी करने वाला आदमी हा शहरभर म शंख बजावत घूमत रिहिस। हमन बजार म जाके खड़े हो गेन। हमर अफ्रीकन संगवारी मन डिजाइन वाले कपड़ा के गट्ठरमन ला अउ गूलर के लकड़ी ले बने नक्काशीदार संदूक मन ला खोलिन। येकर बाद बैपारीमन अपन सुंदर समानमन ला सजाइन। मिस्र देश के मोम लगे लिनन, इथियोपिया के रंगबिरंगी लिनन, टियार ले लाय गे बैंगनी स्पंज, सिडोन के नीला परदा, एंबर के प्याला, कांच के सुंदर-सुंदर बर्तन अउ पके मिट्टी के एक से बढ़के एक सुंदर बर्तन। एक घर के छत ले कुछ महिलामन हमन ला देखत रिहिन। वोमा से एक झन हा चमड़ा के सुनहरा रंग के मुखौटा लगाय रिहिस।
पहिली दिन पादरीमन आइन अउ हमर ले मोलभाव करके समान बिसाइन। दूसर दिन कुलीन घर के मनखेमन आइन, अउ तीसर दिन कारीगीर अउ गुलाम मनखेमन आइन। बैपारीमन जब तक कोनो शहर म रहिथें तब इही नियम के अनुसार बैपार होथे।
हमन उहाँ एक महीना रुके रेहेन। जब चंदा हा घटे लगिस तब मंय हा ऊब गेंव अउ शहर के गलीमन म घूमत-घामत उहाँ के देवता के बगीचा म पहुँच गेंव। पींयर वस्त्र पहिने पुजारी हा हंरियर-हंरियर पेड़मन के बीच ध्यान लगाके धीरे-धीरे टहलत रिहिस। करिया रंग के संगमरमर के फर्स के ऊपर गुलाबी-लाल रंग के एक ठन घर रिहिस जिहाँ देवतामन निवास करंय। घर के दरवाजा हा लाख के बने रिहिस जेकर ऊपर सोन के बइला अउ मयूर के आकृति उंकेरे गे रिहिस। घर के छत म समुद्री हरियर रंग के टाइल्स लगे रिहिन अउ छज्जामन म छोटे-छोटे घंटी ओरमे रिहिन। सफेद कबूतरमन जब उड़ंय तब उंकर डेना ले टकराके घंटीमन बाजंय।
मंदिर के आगू साफ पानी के कुंड रिहिस जेकर फर्स हा धारीदार गोमेद पत्थर के बने रिहिस। मंय हा विही तीर लेट गेंव। उहाँ के चौड़ा-चौड़ा पत्तीमन ला छुएंव। तभे एक पुजारी हा मोर कना आइस अउ मोर पीछू खड़ा हो गिस। वोहर पांव म सैंडिल पहिरे रिहिस; एक ठन हा सांप के मुलायम खाल के अउ दुसरा हा चिरई के डेनामन के बने रिहिस। वोकर सिर म करिया रंग के टोपी रिहिस जउन हा आधा चंदमा्र के चित्र ले सजे रिहिस। वोकर चोंगा म पींयर रंग के सात चक्का बुने रिहिस अउ वोकर करिया बालमन म सुरमा लगे रिहिस।
थोड़िक देर बाद वोहर मोर ले बात करिस अउ मोर इच्छा पूछिस। मंय हा केहेव कि मोर इच्छा देवता के दर्शन करे के हे।
’देवता हा अभी शिकार करे बर गे हे,’ पुजारी हा मोर तरफ अजीब तिरछा नजर ले देखके किहिस।
’मोला बता कि वोहर कोन जंगल म गे हे, महूँ हा वोकर कना जाहूँ,’ मंय हा केहेंव।
वोहर अपन लंबा अउ नुकीला नाखूनमन ले अपन चोंगा ल सुधारिस अउ फुसफुसा के किहिस, ’देवता हा अभी सोवत हे।’
’मोला बता कि वोहर कोन पलंग म सुते हे, मंय हा वोकर पहरादारी करहूँ’, मंय हा केहेंव।
’देवता हा अभी दावत म गे हे,’ वोहर किहिस।
’अगर शराब ह मीठ होही तब मंय हा वोकर संग पीहूँ, अउ कहूँ करू होही तब घला मंय हा वोकर संग पीहूँ,’ मंय हा जवाब देंव।
वोहर हैरान होके अपन सिर ला नवाइस, मोला उठाइस अउ मोर हाथ ला धरके मोला मंदिर के बाहिर कर दिस।
उहाँ पहिली कमरा म मंय हा एक मूर्ति देखेंव जउन हा जैस्पर रत्न के सिंहासन ऊपर विराजमान रिहिस, जेकर चारों मुड़ा बड़े-बड़े कीमती मोती जड़े रिहिन। देवता हा आबनूस के लकड़ी ले बने रिहिस अउ देखे में बिलकुल इंसान सरीख रिहिस। वोकर माथा म एक ठन माणिक जड़े रिहिस अउ वोकर बालमन ले गाढ़ा तेल टपकत रिहिस। वोकर गोड़मन मेमना के बलि के रकत ले लाल हो गे रिहिस अउ वोकर कमर म कमरबंद रिहिस जउन म सात ठन बेरिल रत्न जड़े रिहिस।
मंय हा पुजारी ले पूछेंव, ’का इही हा देवता हरे?’
वोहर जवाब दिस, ’हाँ, इही हा देवता हरे।’
मंय हा चिल्ला के केहेंव, ’मोला देवता ला दिखा नहीं ते मंय हा तोला मार डारहूँ,’ अउ जइसने मंय हा वोकर हाथ ला छुएंव, वोहर सुखा गिस।
तब पुजारी हा मोर विनती करके किहिस, ’हे! स्वामी, अपन ये सेवक ला ठीक कर दे। मंय हा आपला वो देवता ला देखा देहूँ।’
मंय हा वोकर हाथ म फूंक मारेव अउ वोहर पहिली जइसे हो गिस। वोहर कांपे लगिस अउ मोला दुसरा कक्ष म लेगिस। मंय हा उहाँ देखेंव, हंरियर रत्न के पत्थर से बने कमल के फूल ऊपर एक मूर्ति खड़े रिहिस जउन ला बड़े-बड़े पन्ना ले सजाय गे रिहिस। वो मूर्ति हा हाथी दांत के बने रिहिस अउ वोकर ऊँचाई हा एक इंसान के ऊँचाई ले दुगुना रिहिस। वोकर माथा म क्राइसोलाइट नामक सुनहरा रत्न जड़े रिहिस, अउ वोकर छाती म लोभान अउ दालचीनी के लेप करे गे रिहिस। एक हाथ म वोहर हरियर मणि ले बने राजदंड धरे रिहिस अउ दूसर हाथ म एक ठन चमकीला कांच रिहस। वोहर पीतल के बने पनही पहिरे रिहिस अउ वोकर गर म सेलेनाइट पत्थर के बने हार रिहिस।
मंय हा पुजारी ले पूछेंव, ’का इही हा वो देवता हरे?’
पुजारी हा किहिस, ’हाँ। इही हा वो देवता हरे।’
’मोला अपन देवता ला देखा,’ मंय हा चिल्ला के केहेंव, ’नइ ते मंय हा तोला मार डारहूँ’ अउ मंय हा वोकर आँखी ला छुएंव अउ वोहर अंधरा हो गिस।
तब पुजारी हा मोर से बिनती करिस, ’हे! स्वामी, अपन सेवक ला ठीक कर दे। मंय हा आप ला देवता दिखलाहूँ।’
मंय हा वोकर आँखी म फूंक मारेंव अउ वोकर नजर हा वापिस आ गिस। वोहर फेर कांपे लगिस अउ मोला तिसरइया कक्ष म लेगिस। अउ देखव! उहाँ कोनो मूर्ति या कोनो आकृति नइ रिहिस। बल्कि पथरा के वेदी म धातु के बनल एक ठन आइना माडे रिहिस।
मंय हा पुजारी ले पूछेंव, ’देवता हा कहाँ हे?’
अउ वोहर मोला जवाब दिस, ’वो आइना के सिवा अउ कोनो ईश्वर नइ हे जउन ला तंय हा अभी देखत हस, काबर कि येहर ’’ज्ञान के आइना’’ हरे। येहर धरती अउ सरग के हर चीज ला देखाथे, सिवाय वो इंसाान के चेहरा के जउन हा वोमा देखत रहिथे। येहर वोकर चेहरा ला नइ देखावय ताकि येमा देखने वाला इंसान हा खुद ज्ञानी बन सके। दुनिया म अउ कतनो आइना हे फेर वोमन इंसान के नजरिया भर ला देखाने वाला ’मत’ के आइना हरें। ये अकेला आइना हे जउन हा ’ज्ञान’ के आइना हरे। जेकर कना ज्ञान के आइना होथे वोहर सब कुछ जान जाथे, कुछू वोकर ले छिपे नइ रहि सके। अउ जेकर पास ज्ञान के ये आइना नइ हे, वोकर पास ज्ञान घला नइ हे। येकरे सेती इही हा ईश्वर हरे अउ हम येकरे पूजा करथन’ अउ मंय हा वो आइना म देखेंव। वोहर बिलकुल वइसनेच रिहिस जइसन वोहर बताय रिहिस।
तब मंय हा एक अजीब काम करेंव। मंय हा का करेव, वोकर कोनो महत्व नइ हे। काबर कि इहाँ ले एक दिन के दुरिहा म एक ठन घाटी हे, जिहाँ मंय हा ’ज्ञान के आइना’ ला छिपा देय हंव। बस, मोला तंय हा फिर से अपन भीतर आवन दे, अउ अपन सेवक बनन दे, तब तंय हा दुनिया भर के ज्ञानीमन ले बढ़के ज्ञानी बन जाबे। दुनियाभर के ज्ञान के तंय मालिक बन जाबे। मोला अपन भीतर आवन दे। तब दुनिया म तोर अतका ज्ञानी कोनो दूसर हा नइ होही।’’
तब जवान मछुआरा हा किहिस, ’’पर ज्ञान से बेहतर तो प्रेम हा होथे, अउ जलपरी हा मोर ले गजब प्रेम करथे।’’
’’नहीं! दुनिया म ज्ञान ले बढ़के अउ कोनो चीज हा नइ होवय,’’ आत्मा हा किहिस।
’’प्रेम ले बढ़के अउ कुछ श्रेष्ठ नइ होवय,’’ जवान मछुआरा हा किहिस अउ पानी म छलांग लगा के समुद्र भीतर चल दिस। अउ तब वोकर आत्मा रोवत बिलखत दलदली जमीन कोती चल दिस।
0
अउ जब एक साल अउ पूरिस तब आत्मा हा फेर समुद्र के विही किनारा म आइस, जवान मछुआरा ला पुकारिस। जवान मछुआरा हा पानी ले बाहिर आइस अउ किहिस, ’’तंय हा मोला फेर बलाय हस?’’
तब वोकर आत्मा हा किहिस, ’’मोर नजीक आ, ताकि मंय हा तोर संग गोठ-बात कर सकंव, काबर कि मंय हा बहुत अजीब चीज देखे हंव।’’
मछुआरा हा तब वोकर नजीक आके उथला पानी ऊपर बइठ गिस। अपन सिर ला अपन हाथ म टेका लिस अउ अपन आत्मा के गोठ ला सुने लगिस।
जब मंय हा तोला छोड़ के गेंव तब मंय हा दक्षिण के रद्दा पकड़ेंव। दक्षिणेच ले हर कीमती चीज हा आथे। मंय हा छै दिन सरलग वो रद्दा म चलेंव जउन हा अश्तर शहर कोती जाथे। मंय हा धुर्रा भरे लाल रंग के वो रद्दा म चले लगेंव जेमा चलके तीर्थ यात्रीमन अपन यात्रा करथें। सातवाँ दिन बिहिनिया जब मंय हा आँखी खोलेंव तब मंय हा देखेंव कि वो शहर हा मोर कदम के खाल्हेच म हे। काबर कि वोहर एक घाटी के बीच बसे हे।
ये शहर के भीतर जायबर नौ ठन फाटक हे अउ हर फाटक के आगू पीतल के एक-एक घोड़ा बने हे। जब बेदौइन मन (रेगिस्तानी खानाबदोश) पहाड़ ले खाल्हे उतरथे तब ये घोड़ामन हिनहिनाय लगथें। शहर के परकोटा हा तांबा ले मढ़े गे हे अउ फाटकमन म बने निगरानी गुंबदमन म सदा धनुष-बाण तान के तीरंदाज मन तैनात रहिथें। बिहिनिया होतेच वोमन घंटा बजाथें अउ सांझ होथे तब सींग ले बने बिगुल बजाथें।
जब मंय हा शहर भीतर जाय के कोशिश करेव तब पहरादार मन मोला छेंक लिन अउ मोर बारे म तरह तरह के सवाल पूछिन। मंय हा केहेंव कि मंय हा एक दरवेश हरंव अउ मक्का शहर जावत हंव। उहाँ हरियर रंग के एक ठन परदा हे जेकर ऊपर फरिस्ता हा चांदी के अक्षर म कुरान के आयत लिखे हे। ये सुनके वोमन हैरान हो गिन अउ मोला भीतर जाय के अनुमति दे दिन।
शहर के भीतर बजार के नजारा रिहिस। काश कि तहू हा मोर संग चले रहितेस। उहाँ के गली अउ सड़कमन म कागज के रंगबिरंगा कंडीलमन जोगनी समान हवा म झूलत रिहिन। घर के छत ऊपर जब हवा चलतिस तब वो कंडीलमन रंगीन बुलबुला के भांति खाल्हे ऊपर होय लगतिन। अपन-अपन दुकान के आगू बैपारीमन कालीन बिछा के बइठे रिहिन। उंकर दाढ़ीमन हा सोझ अउ करिया रिहिन। उंकर पगड़ीमन म सोन के चांद-सितारा कढ़ाय रिहिन। उंकर अंगरीमन म एंबर के दाना रिहिस अउ वोमन आड़ू के गुठलीमन के नक्काशीदार माला फेरत रिहिन। कुछ बैपारीमन मैलबेनम (सुगंधित राल) अउ नार्ड (हूम-धूप) बेंचत रिहिन। संगेसंग हिंद महासागर के टापूमन ले लाय गे नाना प्रकार के विचित्र खुशबू, लाल गुलाब के गाढ़ा तेल, लोभान अउ लौंग समान दिखत कलीमन के व्यापार करत रिहिन। जब कोनो हा उंकर ले बात करे खातिर रुकतिस तब वोमन अंगीठी के दहकत कोयला म लोभान के दाना डार देतिन जेकर ले हवा म सुगंध बगर जातिस। मंय हा सीरिया के एक आदमी देखेंव जेकर हाथ म संडेवा समान पतला एक छड़ी रिहिस जिहाँ ले धुआँ निकलत रिहिस अउ वोकर खुशबू हा बसंत के मौसम म फूलनेवाला बादाम के फूल के खुशबू समान रिहिस। कुछ दूसर बैपारीमन चांदी के कंगन बेचत रिहिन जेनमन म नीला रंग के पिरोजा रत्न जड़े रिहिन। उहाँ पीतल के बने पायल घला रिहिन जेनमन म छोटे-छोटे मोती के दाना जड़े रिहिन। येकर अलावा सोना म जड़े बाघ के पंजा, तेंदुआ के पंजा, पन्ना के बाली अउ गोमेद पत्थर जड़े अंगूठी घला बेंचात रिहिस। चायघर म गिटार के मधुर संगीत बजत रिहिस अउ अफीम पियइया मन अपन गोरा, मुस्कुराता चेहरा संग सड़क म रेंगइया मन ला देखत रिहिन।
सच कहंव ते तंय मोर संग होतेस ते बहुत मजा आतिस। शराब बेंचइया मन अपन-अपन खांध म बड़े-बड़े करिया रंग के मशक लाद के भीड़ म अपन बर रास्ता बनावत जावत रिहिन। जादातर वोमन शिराज के शराब बेंचत रिहिन जउन हा मंदरस समान मीठ होथे। वोमन शराब ला धातु के छोटे-छोटे कटोरी म परोसंय अउ ऊपर ले वोमा गुलाब के पंखंुड़ी डारंय।
बजार म फल बेंचइया घला रिहिन जउनमन तरह-तरह के पके फल जइसे अंजीर, जेकर गूदा हा बैंगनी रंग के रिहिस अउ जउनमन चेपटा रिहिन, कस्तूरी समान सुगंधवाला अउ पुखराज समान पींयर खरबूज, चकोतरा, गुलाब जामुन अउ सफेद अंगूर के गुच्छा, गोल लाल-सुनहरा संतरा अउ हरियर सुनहरा रंग के अंडाकार नींबू बेंचत रिहिन। एक घांव मंय हा एक ठन हाथी ला गुजरत देखेंव। वोकर सूंड़ म सिंदूर अउ हरदी लगे रिहिस, कान मन म गाढ़ा लाल रंग के रेशम के डोरी ले बने जाली लगे रिहिस। हाथी हा एक ठन दुकान के आगू रुकिस अउ संतरा खाय लगिस, तब देखइया मन हाँसे लगिन। तंय हा सोच घला नइ सकस कि उहाँ के आदमीमन कितना अजीब रिहिन। जब वोमन खुश रहितिन तब चिरई बेंचइया कना लोहा के पिंजरा म बंद कोनो चिरई ला खरीदतिन अउ वोला अगास म उड़ा देतिन ताकि उंकर खुशी हा अउ बढ़ जाय। अउ जब दुखी रहितिन तब खुद ला कांटा म मारतिन ताकि उंकर दुख हा कम हो जाय।
एक दिन सांझ के समय मंय हा कुछ नीग्रो आदमीमन ले मिलेंव जउनमन बजार ले गुजरत एक ठन भारी पालकी ला बोहे रिहिन। पालकी हा सोन के रंग के पालिशवाले बांस के बने रिहिस अउ वोकर डंडा म सिंदूर के रंग जइसे लाल रंग के रिहिस जउनमन म पीतल के मंजूर जड़े रिहिन। खिड़कीमन म मखमल के परदा झूलत रिहिन जउनमन म तितिली के पंख अउ छोटे-छोटे मोती जड़े रिहिन। पालकी हा जब मोर नजीक ले गुजरिस तब एक सेठराहा चेहरावाली सर्कसियन महिला हा बाहर झांकिस अउ मोला देखके मुसकाइस। मंय हा वोकर पीछू-पीछू चले लगेंव तब नीग्रो कहारमन तेज चाल चले लगिन अउ गुर्राके मोला देखिन। फेर मोला कोनो फिकर नइ रिहिस। मोर मन म उत्सुकता जागे लगिस।
आखिर म वोमन एक चौकोर सफेद घर के आगू रुकिन। वो घर म कोनो खिड़की नइ रिहिस, बस एकठन नानचुक दरवाजा भर रिहिस, जइसे कोनो कब्र के होथे। वोहर पालकी के खाल्हे रखे तांबा के हथैड़ा ले तीन घांव दरवाजा ला बजाइस। हरियर चमड़ा के चोंगा पहिने एक झन आर्मेनियाई आदमी हा दरवाजा ले झांक के देखिस अउ तुरते दरवाजा ला खोलिस अउ जमीन ऊपर कालीन बिछाइस, जेकर ऊपर पांव रख के वो महिला हा बाहिर निकलिस। भीतर जावत समय वोहर मुड़क के मोला अउ देखिस। मंय हा पहिली कभू अतका पींयर शरीर वाले नइ देखे रेहेंव।
जब चांद उइस तब मंय हा फेर विही जघा आ गेंव अउ वो घर ला खोजेंव, फेर वो घर हा अब वो जघा नइ रिहिस। तब मोला समझ मा आ गिस कि वो महिला हा कोन रिहिस अउ वोहर मोला देखके काबर मुसकाय रिहिस।
सच कहत हंव, तोला मोर संग रहना रिहिस। नया चांद के तिहार के दिन जवान सम्राट हा अपन महल ले बाहर निकलिस अउ प्रार्थना करे बर मस्जिद गिस। वोकर बाल अउ दाढ़ी हा गुलाब फूल के पत्ती के रंग म रंगे रिहिस। वोकर गाल म सोना के बारीक पावडर लगे रिहिस। वोकर हथेली अउ पंवरीमन केसर लगे के कारण पींयर दिखत रिहिन।
बेर उवे के बाद वोहर चांदी के चोंगा पहिनके महल ले बाहिर निकलिस अउ बेर डुबे के बाद सोना के चोंगा पहिनके वापिस लहुट गिस। वोला देखके लोगबाग जमीन म लोट गिन फेर मंय हा अइसन नइ करेंव। मंय हा खजूर बेचइया के दुकान कना खड़े रेहेंव अउ वोकर जाय के अगोरा करत रेहेंव। सम्राट हा जब मोला देखिस तब वोहर अपन सजे-संवरे भौंहमन ला उठाइस अउ रुक गिस। मंय बिलकुल अचल खड़े रेहेंव अउ वोला कोनो सम्मान नइ देयेंव। आदमीमन मोर हिम्मत देखके हैरान होइन अउ मोला शहर छोड़के भाग जाय के सलाह दिन। मंय हा उंकर बात ऊपर कोनो धियान नइ देंव बल्कि वो आदमी मन के नजीक जाके बइठ गेंव जउनमन अजीब-अजीब देवता के मूर्ति बेंचत रिहिन, जउनमन ले उंकर काम के कारण लोगन नफरत करंय। जब मंय हा अपन करनी ला बतायेंव तब वोमा के सबझन मोला देवता के मूर्ति दिन अउ मोला उहाँ ले जाय के सलाह दिन।
वो रात जब मंय हा अनारवाले गली म एक ठन चायघर म एक गद्दा म लेटे रेहेंव तब सम्राट के सैनिकमन भीतर आइन अउ मोला पकड़ के महल म लेग गिन। जइसने मंय हा भीतर गेंव, वोमन सबो दरवाजा ला बंद कर दिन अउ उंकर संकरी मन ला लगा दिन। भीतर एक बहुत बड़े आंगन रिहिस जेकर चारों मुड़ा मेहराबदार गलियारा बने रिहिस। दीवारमन म सफेद संगमरमर लगे रिहिस। कहूँ कहूँ नीला अउ हरा रंग के टाइल लगे रिहिन। खंभामन हरियर संगमरमर के रिहिन। फर्स हा आड़ू के फूल जइसे गुलाबी रंग के संगमरमर ले बने रिहिस। मंय हा अउ पहिली अइसन चीज नइ देखे रेहेंव।
जब मंय हा आंगन ले होके गुजरत रेहेंव तब नकाब पहिरे दू झन महिलामन बालकनी ले मोर डहर देखके मोला कोसे लगिन। पहरेदार मन तेजी ले आगू बढ़िन। उंकर भालामन पालिश लगे फर्रस म टकरा के बाजे लगिन। वोमन हाथी दांत के बनल एक ठन दरवाजा ला खोलिन अउ मंय हा सात परत वाले एक बगीचा म पहुँच गेंव। उहाँ ट्यूलिप अउ मूनफ्लावर के पौधा लगे रिहिन अउ चांदी जड़े एलोविरा के पौधा रिहिन। धुंधरा हवा म क्रिस्टल लगे एक डंडा ले फौव्वारा चलत रिहिस। सरू के पेड़मन बुझाय मशाल सही दिखत रिहिन। वोमा से एक पेड़ म एक बुलबुल चिरई हा गीत गावत रिहिस।
बगीचा के आखिर म छोटकुन एक ठन मंडप रिहिस। जइसने हमन वोकर नजीक पहुँचेन, दू झन हिजड़ामन हमर स्वागत करे खातिर बाहिर आइन। वोमन लड़खड़ावत चलत रिहिन अउ अपन पींयर पलक वाले आँखी ले मोर डहर उत्सुक होके देखत रिहिन। वोमा से एक झन हा पहरादार मनके कप्तान ला बलाके धीरे-धीरे कुछ किहिस। दुसरा हिजड़ा हा मटकावत नीला रंग के एक डब्बा ले खुशबूदार गोली निकाल के खाइस।
थोरिक देर बाद कप्तान हा सैनिकमन ला वापिस भेज दिस। वोमन महल कोती चल दिन। हिजड़ामन घला उंकर पीछू-पीछू मटकावत चले लगिन। जावत-जावत वोमन पेंड़ ले फर टोर-टोर के खावत रिहिन। जावत-जावत वोमा से एक हिजड़ा हा जउन हा जादा उमर के रिहिस, मोर कोती मुड़कके देखिस अउ मोला व्यंग मारत हाँस दिस।
तब कप्तान हा मोला मंडप के भीतर जाय के इशारा करिस। मंय हा बेधड़क दरवाजा के परदा ला सरकाके भीतर चल देंव।
जवान सम्राट हा बघवा के रंगीन सोफा म लेटे रिहिस। वोकर कलाई म एक ठन बाज बइठे रिहिस। वोकर पीछू नूबियन गुलाम खड़े रिहिस जउन हा पीतल के पगड़ी पहिने रिहिस। वोकर कमर के ऊपर शरीर हा नंगा रिहिस अउ वोकर कानमन मा भारी बाली झूलत रिहिन। बाली के वजन के सेती छेदामन हा फलक गे रिहिन। सोफा के नजीक रखे एक ठन टेबुल म स्टील के एक ठन बहुत बड़े तलवार माड़े रिहिस।
सम्राट हा जब मोला देखिस तब गुस्सा के मारे वोकर चेहरा हा तमतमा गिस। वोहर मोला पूछिस, ’तोर का नाम हे? का तोला पता नइ हे कि मंय हा ये शहर के सम्राट हरंव?’
फेर मंय हा वोकर सवाल के कोनो जवाब नइ देंव।
सम्राट हा तलवार कोती इशारा करिस। नूबियन गुलाम हा तुरते तलवार ला उठाइस अउ पूरा जोर लगा के मोर ऊपर वार कर दिस। तलवार हा मोर शरीर के आरपार निकल गिस फेर मोला कुछू नइ होइस। भय के मारे नूबियन हा फर्स म गिर गिस। डर के मारे वोकर दांतमन किटकिटाय लगिन। वोहर उठिस अउ सोफा के पीछू लुका गिस।
सम्राट हा तुरते उछल के उठिस। हथियार के मंच ले एक ठन भाला निकालिस अउ मोला फेंक के मारिस। भाला ला मंय हा हवाच म पकड़ लेव अउ वोला मुरकेट के दू टुकड़ा म टोर देंव। वोहर मोर ऊपर तीर चलाइस तब मंय हा अपन हाथ ला उठा के वोला हवाच म रोक देंव। तब वोहर सफेद चमड़ा के अपन बेल्ट ले एकठन खंजर निकालिस अउ वोला नूबियन गुलाम के गर म घोंप दिस। ये सोच कि कहू वोकर ये अपमान के बात ला वोहर सबझन ला बता झन दे। वो गुलाम हा अधमरा सांप के समान तड़पे लगिस अउ वोकर मुँहू ले रकत निकले लगिस।
गुलाम के मरते साट सम्राट हा मोर कोती मुड़किस। वोहर बैंगनी रेशम के रुमाल से अपन माथा के पसीना ला पोंछिस अउ मोर से किहिस, ’का तंयहर कोनो पैगंबर हरस, जउन ला मंय हा कोनो नुकसान नइ पहुँचा सकंव? मोर बिनती हे कि आप आजे रात मोर शहर ला छोड़के चले जाव, काबर कि जब तक आप इहाँ हव, मंय हा इहाँ के सम्राट नइ हो सकंव।’
मंय हा जवाब देंव, ’आप अपन खजाना के आधा हिस्सा ला मोला दे सकथव तब मंय जरूर चले जाहूँ। मोला अपन खजाना के आधा हिस्सा ला दे दव, मंय हा चले जाहूँ।’
वोहर मोर हाथ ला धरके मोला बगीचा म ले गिस। रक्षक सैनिक के कप्तान हा जब मोला देखिस तब वोहर हैरान हो गिस। हिजड़ामन जब मोला देखिन तब उंकर गोड़मन कांपे लगिन अउ डर के मारे वोमन जमीन म गिर गिन।
महल म एक ठन अइसन कमरा हे जेकर लाल पत्थर के बने आठ ठन दिवाल हे अउ पीतल के परत वाले छत म कतरो अकन दीया ओरमत हें। सम्राट हा एक ठन दिवाल ला छुइस अउ वोहर खुल गिस। हमन एक गलियारा ले होके गुजरेन जउन हा कई ठन मशाल के अंजोर ले जगमगात रिहिस। दीवार के दुनों तरफ बने खोलीमन म शराब के बड़े-बड़े मटका माड़े रिहिन जउनमन हा ऊपर तक चांदी के सिक्का ले भरे रिहिन। जब हमन गलियारा के बीचोंबीच पहुँचेन तब सम्राट हा वो शब्द किहिस जउन ला केहे नइ जा सके, तभे एक गुप्त स्प्रिंग के मदद ले ग्रेनाइट के दरवाजा खुल गिस, अउ सम्राट हा अपन आँखीमन ला चौधियाय ले बचाय खातिर अपन हाथ ले अपन चेहरा ला ढांक लिस।
तोला विश्वास नइ होही कि वोहर कितना अद्भुत जगह रिहिस। उहाँ मोती ले भरे बड़े-बड़े कछुआ के खोल रिहिन, अउ बड़े-बड़े चंद्रकांत मणि रिहिन जउन म लाल माणिक भरे रिहिस। हाथी के खाल ले बनल थैलामन म सोना भराय रिहिस। उहाँ गोमेद अउ नीलम रिहिन, गोमेद हा क्रिस्टल कांच के कटोरा म अउ नीलम हा हरियर रत्न के कटोरा मन म भराय रिहिस। हाथी दांत के पतली पटनीमन म गोल हरियर पन्ना सजे रिहिन। एक कोना म रेशम के थैली रखे रिहिन जउनमन म कुछ हा फिरोजा पत्थर अउ कुछ हा बेरिल पत्थर ले भरे रिहिन। हाथी दांत के बने सींगमन म बैंगनी रंग के नीलमणि भरे रिहिन। पीतल के बनल सींगमन म कैल्सेडोनी अउ सार्ड पत्थर भरे रिहिन। देवदार के लकड़ी के खंभामन म पींयर रंग के लिंक्स पत्थर के लड़ी ओरमे रिहिन। अंडाकार ढालमन म लाल रत्न जड़े रिहिन, जेमा कुछमन मदिरा के रंग के तब कुछमन घांस के रंग के रिहिन। उहाँ के जउन वर्णन मंय हा तोला सुनात हंव वोहर तो बस उहाँ के दौलत के मात्र दसवाँ हिस्सा हरे।
सम्राट हा अपन चेहरा ले जब अपन हाथ ला हटाइस तब वोहर मोर ले किहिस, इही हा मोर खजाना हरे अउ जइसे कि मंय हा आप ले वादा करे हंव, येकर आधा हिस्सा हा आपके हरे। मंय हा येला लेगे खातिर ऊँट अउ ऊँटवान देहूँ जउनमन आपके आज्ञा के पालन करहीं अउ आपके खजाना ला दुनिया कोनो कोना म आप जिहाँ चाहहू उहाँ पहुँचा दिहीं। ये काम हा आजे रात के हो जाना चाही काबर कि मंय नइ चाहंव कि सूर्य, जउन हा मोर पिता हरे, देखे कि ये शहर म एक अइसे इंसान हे जउन ला मंय हा मार नइ सकंव।
मंय हा उत्तर म केहेंव, ’फेर इहाँ मौजूद सब सोना, सब चांदी, सबो बहुमूल्य हीरा जवाहरात, मणि माणिक, सब आपके हरे। मोला इंकर कोनो जरूरत नइ हे। मंय आप ले कुछुच नइ लेवंव सिवाय वो छोटे से अंगूठी के जउन हा अभी आपके अंगरी म हे।’
सम्राट के भौंहमन तन गिन, किहिस, ’येहर तो मामूली कांसा के बने हरे, येकर कोनो कीमत नइ हे। विही पाय के खजाना के अपन आधा हिस्सा ला समेटंव अउ ये शहर ले बिदा लेव।’
मंय हा जवाब म केहेंव, ’नहीं, मोला कांसा के वो अंगूठी के सिवा अउ कुछूच नइ होना काबर कि मोला पता हे कि वोमा का लिखाय हे अउ वोहर का काम के हे।’
सम्राट हा कांप गिस अउ मोर अर्जी बिनती करत किहिस, ’पूरा खजाना ला ले लव, मोर आधा हिस्सा ला घला ले लव फेर ये शहर ला छोंड़ के चले जाव।’
मंय हा एक अजीब काम करे हंव, फेर का करे हंव येला झन पूछ। इहाँ ले एक दिन के दूरी म एक गुफा हे जिहाँ मंय हा ’धन के अंगूठी’ ला छिपा के रखे हंव। बस एक दिन के रद्दा हे। वोहर तोर आय के अगोरा करत हे। जेकर तीर ये अंगूठी हे वोहर दुनिया के सब राजा ले अमीर होही। तब चल मोर संग, वोला अपन अंगरी म पहिन अउ दुनिया के सबले जादा अमीर आदमी बन।’’
आत्मा के बात ला सुनके जवान मछुआरा हा हाँस दिस अउ किहिस, ’’दुनिया के सब दौलत ले घला जादा कीमती प्रेम हा होथे अउ वो नन्हीं जलपरी हा मोर ले अघात प्रेम करथे।’’
’’नहीं! दौलत से कीमती अउ कुछू नइ होय।’’ आत्मा हा किहिस।
’’प्रेम जादा बेहतर होथे।’’ जवान मछुआरा हा किहिस अउ समुंदर म कूद गिस। तब आत्मा हा रोवत-कलपत दलदली जमीन कोती चल दिस।
0
तिसरइया साल बीतिस तब आत्मा हा फेर विही समुद्र कना आइस अउ जवान मछुआरा ल पुकारिस। जवान मछुआरा हा समुद्र ले बाहिर निकलिस अउ किहिस, ’’तंय मोला काबर बलाय हस?’’
आत्मा हा किहिस, ’’थोरिक अउ नजीक आ ताकि मंय हा तोर संग गोठिया सकंव। मंय हा बीते सालभर म बहुत विचित्र-विचित्र चीज देखे हंव।’’
मछुआरा हा वोकर नजीक आइस अउ छिछला पानी म बइठ गिस। अपन मुड़ी ला अपन हाथ म टेका लिस अउ आत्मा के बात ला सुने लगिस।
आत्मा हा वोकर ले किहिस, ’’मंय हा एक अइसे शहर के बारे म जानथंव जिहाँ एक नदिया के किनारे म एक ठन सराय हे। उहाँ मय हा डोंगहार मन संग बइठे रेहेंव। वोमन अलग-अलग रंग के शराब पीयत रिहिन। सिरका म तर रोटी अउ नमकीन मछली खावत रिहिन जउन ला तेजपत्ता के संग परोसे गे रिहिस। जब हमन उहाँ बइठ के मजा उड़ावत रेहेन, तभे एक झन डोकरा आइस। वोकर तीर चमड़ा के एकठन कालीन अउ एक ठन वीणा रिहिस जउन म एंबर के दू ठन सींग लगे रिहिन। अउ जब वोहर जमीन म कालीन ला बिछाइस अउ अपन वीणा ला बजाइस तभे एक झन लड़की भीतर आइस जेकर चेहरा हा ढंकाय रिहिस अउ वोहर हमर आगू नाचे लगिस। वोकर चेहरा हा भले एक बारीक जालीदार कपड़ा ले ढंकाय रिहिस फेर वोकर गोड़मन दिखत रिहिन। वोकर गोड़मन कालीन ऊपर अइसे थिरकत रिहिन मानो छोटे-छोटे सफेद कबूतर मन फुदकत होंय। मंय हा येकर ले जादा विचित्र नजारा अउ पहिली नइ देखे रेहेंव। वो शहर हा इहाँ ले बस एक दिन के दुरिहा म हे।
मछुआरा हा जब अपन आत्मा के बात ला सुनिस तब वोला अपन जलपरी के सुरता आइस। जलपरी के तो गोड़ेच नइ हे अउ वोहर नाच नइ सकय। वोकर मन म प्रबल इच्छा जागिस अउ खुद ले किहिस, बस एके दिन के तो रद्दा हे, फेर तो मंय हा अपन मयारुक तीर लहुट के आ जाहूँ। वोहर हाँसिस, उथला पानी म खड़ा होइस अउ अपन आत्मा के नजीक आइस।
जब वोहर सूखा जमीन म पहुँचिस तब फेर हाँसिस अउ अपन आत्मा डहर अपन बांहमन ल फैलाइस। वोकर आत्मा हा खुशी के मारे चिल्लाइस अउ दंउड़ के वोकर नजीक आइस अउ वोकर भीतर समा गिस। तब जवान मछुआरा हा रेती के ऊपर अपन छइंहा ला देखिस जउन हा असल में वोकर आत्मा के शरीर रिहिस।
वोकर आत्मा हा किहिस, ’’अब इहाँ अउ झन बिलम, तुरंत चल काबर कि समुद्र के देवता हा ईर्ष्यालू हे अउ वोकर कना अइसन राक्षस हें जउनमन वोकर कहना मानथें।’’
वोमन उहाँ ले तुरते चले लगिन। रातभर चंदा के अंजोर म यात्रा करिन, दिनभर सूरज के तपत गरमी म रेंगिन अउ सांझ होवत वोमन एक शहर म पहुँच गिन।
जवान मछुआरा हा अपन आत्मा ले पूछिस, ’’का इही हा वो शहर हरे जिहाँ वो नचकारी लड़की हा नाचथे?’’
आत्मा हा जवाब दिस, ’’येहर कोनो दूसर शहर हरे, तभो ले चल येकर भीतर चलथन।’’
तब वोमन शहर के भीतर गिन अउ गली-गली घूमे लगिन। जब वोमन जौहरीमन के गली म गिन तब जवान मछुआरा हा एक दुकान म सजे एक ठन चांदी के सुदर कटोरी देखिस। वोकर आत्मा हा किहस, ’’येला चुपचाप उठा के धर ले अउ लुका ले।’’
जवान मछुआरा हा वो कटोरी ल उठा के अपन अंगरखा म छिपा लिस अउ वोमन जल्दी-जल्दी शहर ले निकल गिन।
शहर ले दुरिहा जाय के बाद जवान मछुआरा हा अपन आत्मा ले किहिस, ’’तंय हा मोला ये कटोरी ला उठाय बर, येला लुका के रखे बर काबर केहेस। येहर तो बुरा काम हरे।’’ अउ वोहर वो कटोरी ला फेंक दिस।
’’धीरज रख, धीरज रख,’’ वोकर आत्मा हा किहिस।
दूसर दिन सांझकुन फेर वोमन एक शहर म पहुँचिन। मछुआरा हा पूछिस, इही हा वो शहर हरे का जिहाँ वो नचकार लड़की हा नाचथे अउ जेकर बारे म तंय हा बताय रेहेस?’’
वोकर आत्मा हा किहिस, ’’यहू हा वो शहर नो हे, कोनो दूसर शहर हरे। तभो ले येकर भीतर चल।’’
वोमन शहर के भीतर गिन अउ उहाँ के गलीमन म घूमे लगिन। जब वोमन चप्पल बेचइया मन के गली ले गुजरत रिहिन तब जवान मछुआरा हा नानचुक एक लइका ला पानी के एक मटका के नजीक खड़े देखिस। वोकर आत्मा हा वोला किहिस, ’’लइका ला मार।’’ वोहर लइका ला अतका मारिस कि वोहर रोय लगिस। अउ तब वोमन जल्दी-जल्दी उहाँ ले भाग गिन।
शहर ले बाहिर कुछ दूर आइन तब जवान मछुआरा ला अपन आत्मा ऊपर बहुत गुस्सा आइस, वोहर किहिस, ’’तंय हा मोला वो बालक ला मारे बर काबर केहेस, येहर तो बहुत बुरा काम हरे।’’
तब वोकर आत्मा हा किहिस, ’’शांत हो जा, शांत हो जा।’’
तीसर दिन सांझकुन वोमन अउ एक शहर म पहुँचिन। जवान मछुआरा हा अपन आत्मा ले पूछिस, ’’इही हा वो शहर हरे का जिहाँ सुंदर लड़की हा नाचथे? जेकर बारे म तंय हा बताय रेहेस?’’
वोकर आत्मा हा किहिस, ’’हो सकथे, येहर विही शहर होही। चल येकर भीतर जाके देखथन।’’
वोमन शहर के भीतर गिन अउ ये गली ले वो गली घूमे लगिन,फेर जवान मछुआरा ल न तो वो नदिया हा दिखिस अउ न वो सराय हा। शहर निवासीमन वोमन ला शंसय अउ हैरानी ले देखे लगिन जेकर कारण वोहर डर गिस। वोहर अपन आत्मा ले किहिस, ’’चल इहाँ ले, काबर कि वो लड़की जेकर गोड़मन गोरा हें अउ जउन हा नाचथे, इहाँ नइ हे।’’
तब वोकर आत्मा हा किहिस, ’’नइ, इहिंचे रुकबोन। रात बहुत हो गे हे अउ रद्दा म चोर लुटेरा मिल सकथें।’’
वोहर बजार म बइठ गिस अउ आराम करे लगिस। थोरिक देर बाद उहाँ ले एक बैपारी गुजरत दिखिस जउन हा हुड वाला चोंगा पहिरे रिहिस। वोहर एक लंबा लउठी के टीप म सींग के बनल कंडील टांगे रिहिस। बैपारी हा पूछिस, ’’तंय हा बजार म काबर बइठे हस? देख, सब दुकानमन बंद हो गे हें अउ समान के गठरी बंध चुके हे।’’
जवान मछुआरा हा किहिस, ’’न तो मोला ये शहर म कोनो सराय मिलिस। अउ न मोर इहाँ कोनो संगा-संबंधी हे जउन हा मोला ठहरा सके।’’
बैपारी हा किहिस, ’’का हम सब आपस म रिश्तेदार नइ हरन? अउ का हम सबला एके ईश्वर हा नइ बनाय हे? विही पाय के तंय हा मोर संग चल। मोर घर म मेहमान मन खातिर अलग खोली हे।’’
जवान मछुआरा हा उठिस अउ बैपारी के पीछू-पीछू रेंगत वोकर घर आ गिस। अनार के बगीचा ला नहक के घर के भीतर गिन तब बैपारी हा वोकर हांथ-पांव धोय बर तांबा के एक ठन बर्तन म गुलाब जल लेके आइस। वोकर प्यास बुझाय बर पाके खरबूजा लाइस अउ खाय बर एक बर्तन म भात अउ मेमना के भूने मांस लाइस।
खाना होय के बाद बैपारी हा वोला मेहमान खोली म लेगिस अउ आराम करे बर किहिस। युवा मछुआरा हा वोला धन्यवाद दिस, वोकर अंगरी के अंगूठी ला चूमिस अउ छेरी के बाल ले बनल रंगीन कालीन म लेट गिस। अउ करिया मेमना के ऊन ले बने चद्दर ला ओढ़ लिस, तब वोला तुरते नींद आ गिस।
पंगपंगाय के तीन घंटा पहिलिच, जब रात बांकी रिहिस, वोकर आत्मा हा वोला जगाइस अउ किहिस, ’’उठ अउ बैपारी के खोली म जा, विही खोली म जिहाँ वोहर सुते हे अउ वोला मार के वोकर सबो सोना ला लेके आ जा। हमला येकर बहुत जरूरत हे।’’
जवान मछुआरा हा उठिस अउ बैपारी के खोली कोती चुपचाप गिस। उहाँ वोकर गोड़ाना कोती एक ठन तलवार माड़े रिहिस अउ वोकर बाजू म एक थाल म सोना ले भरे नौ ठन थैली माड़े रिहिन। वोहर अपन हाथ ला बढ़ाइस, तलवार ला छुइस, तभे बैपारी हा झकनका के जाग गिस अउ कूद के झटकुन तलवार ला पकड़ लिस। वोहर जवान मछुआरा ले किहिस, ’’का तंय हा भलाई के बदला बुराई करत हस? मंय हा तोर ऊपर जउन दया करेंव तेकर बदला म तंय हा रकत बोहाना चाहत हस?’’
तब वोकर आत्मा हा जवान मछुआरा ला किहिस, ’’वोला मार।’’ जवान मछुआरा हा वोकर ऊपर अइसे वार करिस कि वोहर बेसुध हो गिस। तब वोहर सोना के थैलीमन ला धरिस अउ अनार के बगीचा होवत तेजी से उहाँ ले भाग गिन अउ बिहने के सुकवा चंदैनी ला देखत विही दिशा मा रेंगे लगिन।
जब वोमन शहर ले कोस भर दुरिहा चल दिन तब जवान मछुआरा हा अपन छाती ला पीटे लगिस अउ अपन आत्मा ले किहिस, ’’तंय हा मोला बैपारी ला मारे बर अउ वोकर सोना ला धरेबर काबर केहेस? सच कहत हंव, तंय हा बहुत खराब हस।’’
तब वोकर आत्मा हा किहिस, ’’शांत हो जा, शांत हो जा।’’
जवान मछुआरा हा चिल्लाके किहिस, ’’नहीं, मंय हा शांत नइ रहि सकंव। तंय हा मोर ले जउन-जउन काम करवाय हस वो सब ले मोला नफरत हे। बता, तंय हा मोर ले अइसन बेवहार काबर करेस?’’
वोकर आत्मा हा उत्तर दिस, ’’तंय हा मोला अलगा के जब दुनिया म भेजे रेहेस तब मोला हिरदे ला नइ देय रेहेस। इही पाय के मंयहर ये सब काममन ला सीख गेंव अउ इहीमन ले प्रेम करे लगेंव।’’
जवान मछुआरा हा टुड़बुड़ा के किहिस, ’’का बोलेस तंय हा?’’
वोकर आत्मा हा किहिस, ’’तंय हा जानत हस, बनेच जानत हस। का तंय हा भुला गेस कि तंय हा मोला हिरदे नइ देय रेहेस। मोला नइ लगे कि तंय हा भुला गे होबे। इही पाय के कहत हंव, न तो तंय खुद परेशान हो अउ न मेाला परेशान कर। बस शांत रह काबर कि कोनो अइसे दुख नइ हे जउन ला तंय हा दूसर ला नइ देबे अउ न अइसे कोनो सुख हे जउन हा तोला नइ मिलही।’’
अपन आत्मा के अइसन वचन सुनके जवान मछुआरा हा कांप गिस अउ किहिस, ’’नहीं, तंय हा सच म बहुत बुरी हस। तंय हा मोला मोर प्यार ले अलग कर देस। नाना भाति के लालच देके मोला अपन जाल म फंसाएस अउ मोला पाप के रद्दा म ढकेल देस।’’
वोकर आत्मा हा जवाब दिस, ’’तंय अभी भुलाय नइ हस कि जब तंय हा मोला दुनिया म निकाले रेहेस तब मोला कोनो हिरदे नइ देय रेहेस। अब चल कोनो दूसर शहर म जाके मौज-मस्ती करत अपन जीवन जीबोन काबर कि अब हमर कना सोना के अतका थैली हे।’’
फेर जवान मछुआरा हा सोना के नौ के नौ थैलीमन ला धुर्रा म फेंक दिस अउ वोमन ला अपन गोड़ म रमंज दिस। ’’नहीं,’’ वोहर चिल्ला के किहिस, ’’तोर से मोला कोनो लेना-देना नइ हे, अउ अब मंय हा तोर संग कहूँ नइ जांव। तोला जइसे पहिली भगाय रेहेंव तइसने अभी घला भगा देहूँ, काबर कि तंय हा मोर कोनो भला नइ करे हस।’’ तब वोहर चंदा कोती पीठ करके खड़ा होइस। हरियर करैत सांप के चमड़ा के मुठ वाले खंजर ला निकालिस अउ अपन पांव तीर अपन परछाईं ला कांटे के कोशिश करिस जउन हा वोकर परछाईं नइ होके वोकर आत्मा के शरीर रिहिस।
तब घला न तो वोकर आत्मा हा वोकर ले अलग होइस अउ न वोकर बात ला मानिस। वोहर किहिस, ’’चुड़ैल हा तोला जउन मंतर बताय रिहिस हे वोहा अब कोनो काम के नइ हे। अब न तो मंय तोला छोंड़ सकंव अउ न तंय हा मोला अपन ले दुरिहा भगा सकस। आदमी हा एक घांव अपन आत्मा ला अपन ले अलगा सकथे फेर वोला वापस पाय के बाद वोला सदा-सदा बर अपन पास रखना पड़थे। इही हा वोकर सजा घला हरे अउ इनाम घला।’’
वो जवान मछुआरा हा आत्मा के बात ला सुनके फक पड़ गिस। अपन मुठामन ला कंसके बांधके वोहर जोर से चिल्लाइस, ’’वो तो एक धोखाबाज चुड़ैल रिहिस काबर कि वोहर मोला ये बात ला नइ बताय रिहिस।’’
वोकर आत्मा हा उत्तर दिस, ’’नहीं, वोहर तो जेकर पूजा करथे वो देवता के प्रति सच्ची रिहिस, अउ वोहर सदा वोकरे दासी बनेे रहही।’’
जवान मछुआरा ला बात जब समझ म आइस कि वोहर अब कभू अपन आत्मा ले छुटकारा नइ पा सके अउ अब सदा वोकर संगे म रहिही, अउ येहर एक दुष्ट आत्मा हरे तब दुख के मारे वोहर धरती में गिर गिस अउ कल्हर-कल्हर के रोय लगिस।
अगला दिन जवान मछुआरा हा उठिस अउ अपन आत्मा ला किहिस, ’’मंय हा अपन हाथमन ला बांध लूहूँ ताकि मंय हा तोर कोनो बात ला माने के लाइक मत रहंव, अपन होंठमन ला बंद कर लेहूँ ताकि तोर कोनो वचन हा मोर मुँहू ले झन निकले। मंय हा वापिस विही जघा जाहूँ जिहाँ मोर मयारुक हा रहिथे। मंय हा समुद्र तीर विही छोटे से खाड़ी म वापिस जाहूँ जिहाँ वोहर गीत गाथे। मंयहर वोला बुलाहूँ अउ बताहूँ कि मंय हा कोन-कोन से पाप करे हंव अउ तंय हा मोर संग का-का छल करे हस।’’
वोकर आत्मा हा वोला फिर से बहकाय खातिर किहिस, ’’आखिर वो तोर मयारुक हा हरे कोन जेकर पास तंय हा वापिस जाना चाहत हस? ये दुनिया म वोकरो ले बढ़के सुंदर स्त्री हें। समरिस के नर्तकीच मन ला देख ले जउनमन तरह-तरह के पशु अउ पक्षीमन के समान नाचथें। उंकर पांवमन म मेंहदी लगे रहिथे अउ हाथमन म तांबा के छोटे-छोटे घुंघरू बंधाय रहिथे। नाचत-नाचत वोमन खिलखिलाके हाँसथें। उंकर हँसी हा पानी बोहावत कल-कल करत धारा के आवाज सरीख निर्मल अउ मधुर रहिथें। मोर संग चल, मंय हा वोमन ला तोर से मिलवाहूँ। जउन पाप होगिस तेकर बात ला धरके तंय हा अतका चिंता-फिकर काबर करत हस? स्वाद वाले खाय के जिनिसमन हा का खायेच बर नइ बने हे? का मीठा शरबत म जहर हो सकथे? दुख मनावत झन बइठ अउ मोर संग कोनो दूसर शहर म चल। नजीके म एक छोटे से शहर हे जिहाँ ट्यूलिप के पेड़मन के सुंदर बगीचा हे। वो बगीचा म सफेद रंग के मयूर अउ नीला छाती वाले मयूर रहिथें। घाम निकलथे अउ जब वोमन अपन पंखमन ला पसारथें तब वो पंखमन हाथीदांत नइ ते चांदी के चमकदार परात कस चमकथें। अउ जउन स्त्री हा वोमन ला दाना खवाथे वोमन वोकर मनोरंजन खातिर नाचथें; कभू अपन गोड़ के भार तब कभू अपन हाथ के भार। वोकर आँखीमन म सुरमा लगे रहिथे अउ वोकर नाकमन कोनो अबाबील चिरई के पंख समान होथें। वोकर नाक म एक लटकन म मोती ले सजे एक ठन फूल झूलत रहिथे। वोहर नाचत समय हँसथे अउ पांव म पहिरे चांदी के पायलमन म लगे घुंघरूमन खनकथें। इही पाय के कहिथंव कि तंय हा अब अउ जादा दुखी झन हो अउ मोर संग चल।’’
जवान मछुआरा हा अपन आत्मा के बात के कोनो जवाब नइ दिस। अपन होठमन ला बंद कर लिस। एक मजबूत रस्सी ले अपन हाथमन ला बांध लिस अउ विही ठउर कोती चल दिस जे कोती ले वोहर आय रिहिस। वो छोटे से खाड़ी डहर जिहाँ वोकर मयारुक जलपरी हा आवत रहिथे। वोकर आत्मा हा वोला बुलावत बुलावत थक गिस फेर वोहर कोनो जवाब नइ दिस। वोहर कोनो बुरा काम नइ करिस जेला वोकर आत्मा हा वोकर ले करवना चाहतिस काबर कि वोकर भीतर मौजूद प्रेम के ताकत हा बहुत प्रबल रिहिस।
जब वोहर समुद्र के तट म पहुँचिस तब वोहर अपन बंधाय हाथ के रस्सी ला खोलिस, अपन होठमन के चुप्पी के मुहर ला टोरिस अउ जलपरी ला पुकारिस। फेर वोहर वोकर बुलावा म नइ आइस। मछुआरा हा दिन भर वोला बलाइस, अउ वोकर विनती करिस। फेर वोहर नइ आइस।
तब वोकर आत्मा हा वोकर खिल्ली उड़ाइस अउ किहिस, ’’तोला अपन ये प्यार ले भला का खुशी हासिल होइस? तंय हा तो वो इंसान के समान हस जउन हा अकाल परे म टुटहा बरतन म पानी भरथे। तंय हा वोकर पीछू अपन सरी चीज ला बरबाद करत हस अउ बदला म तोला कुछू हासिल नइ होवत हे। येकर ले अच्छा हे कि तंय हा मोर संग चल, काबर कि मंय हा जानथंव कि ’आनंद के घाटी’ हा कहाँ हे। अउ उहाँ का-का आनंद मिलथे।’’
फेर वो जवान मछुआरा हा अपन आत्मा के एको बात ला नइ सुनिस। वोहर चट्टान के सेंध म डारा-पाना ले अपन बर झाला बना लिस अउ एक साल विंहचे बिता दिस। रोज बिहिनिया समय वोहर अपन जलपरी ला बलातिस अउ वोकर नाम लेके कलपतिस तभो ले जलपरी हा एको दिन समुद्र ले बाहिर नइ निकलिस। मछुआरा हा वोला हर जघा खोजिस - पहाड़ के कंदरामन म, समुद्र के ज्वार-भाटा से बने तरियामन म, समुद्र के तल म मौजूद कुआँमन म फेर जलपरी हा वोला कोनो जघा नइ मिलिस।
वोकर आत्मा हा वोला सदा बुरा काम करे खातिर उकसात रहय अउ भयानक ले भयानक बात वोकर कान म फुसफुसावत रहय फेर वोला नइ बहका सकिस काबर कि वोकर हिरदे के प्यार हा बहुत प्रबल रिहिस।
0
एक साल बीते के बाद वोकर आत्मा हा मनेमन सोचिस कि मंय हा अपन मालिक ला बुरा ले बुुरा काम करे खातिर ललचायेंव फेर वोहर लालच म नइ आइस काबर वोकर भीतर के प्रेम के ताकत हा मोर ताकत ले जादा सजोर हे। अब मंय हा वोला नेकी के काम बता के ललचाय के कोशिश करहूँ। हो सकथे कि वोहर मोर बात ला मान जाय।
वोहर जवान मछुआरा ले किहिस, ’’मंय हा तोला दुनियाभर के खुशी के बारे म बातायेंव फेर तंय हा मोर एक नइ सुनेस। अब मंय हा तोला दुनिया के दुख के बारे म बतावत हंव, हो सकथे कि तंय हा मोर बात ला सुन सकस। काबर कि ये दुनिया म दुख बहुत हे अउ इही हा दुनिया के मालिक हरे अउ कोनो इंसान येकर जाल से बच नइ सके। बहुत अइसे आदमी हे जिंकर कना पहिरे बर कपड़ा घला नइ हे अउ कतरो अइसन आदमी हें जिंकर कना खायबर रोटी नइ हें। कुछ विधवा अइसन हें जउनमन शाही वस्त्र म रहिथें अउ कतरो अइसन हें जिंकर कना तन ढंके बर कपड़ा नइ हे। कोढ़ीमन ला दलदली धरती म भेज देथें अउ वहूमन एक छूसर संग दुष्टता करथें। सड़क म भिखारीमन भटकत रहिथें अउ उंकर झोली हा खाली रहिथे। शहर के गलीमन म अकाल हा घूमत रहिथे अउ उंकर दरवाजा म महामारी बइठे रहिथे। आ मोर संग अउ उंकर भलाई खातिर कुछ काम करन। तंय हा इहाँ बइठ के अपन मयारुक ला पुकार-पुकारके अपन समय ला बरबाद झन कर जब वोहर तोर पुकार ला सुनतेच नइ हे। अउ आखिर ये प्रेम हा होथेच का चीज जेकर बर तंय हा अपन जिनगी ला खुवार करत हस?’’
तब घला जवान मछुआरा हा कोनो जवाब नइ दिस काबर कि वोकर प्रेम हा अथाह रिहिस। वोहर बिहिनिया होतेच जलपरी ला पुकारे, वोला बलाय, अउ रातकुन वोकर नाम के जाप करे। तभो ले जलपरी हा वोकर से मिले बर कभू समुद्र ले बाहिर नइ आइस अउ न वोहर मछुआरा ला कोनो जघा मिलिस जबकि वोहर वोला हर जघा खोजिस - समुद्र के लहरामन म खोजिस, लहरामन के खाल्हे घाटी म खोजिस, रात के समय बैंगनी रंग म दिखने वाला समुद्र में, अउ बिहिनिया सलेटी रंग म दिखने वाला समंद्र में, हर जघा खोजिस।
0
अइसने दू साल बीत गिस। एक रात जब जवान मछुआरा हा अपन झाला म अकेल्ला बइठे रिहिस तब वोकर आत्मा हा वोला किहिस, ’’देख, मंय हा तोला बुराई के लालच देयेंव, अच्छाई के लालच देयेंव पर तंय हा टस से मस नइ होयेस, काबर कि तोर प्रेम हा मोरो ले जादा सजोर हे। मंय हा हार गेंव अउ अब तोला कभू नइ ललचांव। बस मोला अपन हिरदे म आवन दे ताकि मंय हा फिर से तोर संग एक हो सकंव, जइसन पहिली रेहेंव।’’
’’हाँ, अब तंय हा मोर हिरदे म आ सकथस,’’ जवान मछुआरा हा किहिस, ’’काबर कि जब तंय हा बिना हिरदे के अतका दिन घूमेस तब बहुत दुख उठाय हस।’’
’’हाय!’’ वोकर आत्मा हा किहिस, ’’फेर तोर भीतर जायबर मोला कोनो रद्दा नइ मिलत हे। तोर हिरदे हा प्रेम ले छलकत हे अउ उहाँ बूंद भर घला जघा खाली नइ हे।’’
जवान मछुआरा हा किहिस, ’’काश! तब घला मंय हा तोर कोनो मदद कर पातेंव।’’
जवान मछुआरा के बात हा पूरे घला नइ रिहिस अउ वोकर कान म समुद्र कोती ले रोवई-चिल्लई के करुण आवाज सुनाईस। वइसने आवाज जब समुद्र म कोनो परिवार म ककरो मौत हो जाथे अउ परिवार वाले मन रोथें। वोहर तुरंत उछल के खड़ा होइस अउ अपन झाला ले बाहिर भागत समुद्र तट म पहुँचिस। समुद्र के करिया-करिया लहरामन तट कोती तेजी के साथ एक अइसन चीज ला बोहावत लावत रिहन जउन हा चांदी ले घला जादा सफेद रिहिस। वोहर समुद्र के झाग समान सफेद रिहिस अउ लहरामन के बीच कोनो फूल के समान डोलत रिहिस। लहरामन ले वो चीज ला झागमन हा झोंक लिन अउ जब वोमन किनारा लगिन तब जवान मछुआरा हा देखिस कि नन्ही जलपरी के शरीर हा वोकर पांवमन तीर पड़े हे। जलपरी हा वोकर पांवमन तीर मरे पड़े रिहिस।
जवान मछुआरा हा बोमफारके रोय लगिस अउ रोवत-रोवत विही कना गिर गिस। वोहर वोकर लाल-लाल ठंडा होठमन ला चूमिस अउ वोकर गीला सुनहरा केशमन ला सहलाइस। वोहर वोकरे तीर रेती म लेट गिस, रोवत-रोवत वोहर वोला अपन बांहमन म कंस के अपन छाती म लगा लिस। वोकर होंठमन ठंडा रिहिन तभो ले वोहर वोला चूमिस। वोकर केशमन म खारापन रिहिस तभो ले वोहर वोला चूमिस, वोहर वोकर बंद पलकमन ला चूमिस, वोकर पलकमन म चिपके समुद्र के पानी के खारापन हा वोकर आँसू के खारापन ले कम रिहिस।
तब वोहर जलपरी के मृत देह के आगू अपन सब दुख ला केहे के शुरू करिस, वोकर कान म अपन कहानी के पूरा कड़ुवा सच्चाई के बात ला कहि डारिस। वोहर वोकर छोटे-छोटे हाथमन ला अपन गर म लपेट लिस अउ अपन अंगरीमन म वोकर पातर गर ला छुए लगिस। वोकर मिले के खुशी हा बहुत कड़वी रिहिस अउ वोकर विलाप म एक अजीब प्रसन्नता छिपे रिहिस।
करिया समंदर हा अउ नजीक आ गिस अउ वोकर सफेद झागमन कोनो कोढ़ी के समान कराहे लगिन। झाग हा अपन सफेद पंजामन में समुद्र के किनारा ला जकड़ लिस। समुद्र के राजा के महल ले फेर विलाप के करुण आवाज आय लगिस। दूर समुद्र म बड़े-बड़े ट्राइटनमन अपन सींगमन ला बजाय लगिन।
’’इहाँ ले भाग जा,’’ वोकर आत्मा हा चिल्ला के किहिस, ’’समंदर हा करीब आते जावत हे, नइ भागबे ते वोहर तोला मार डारही। भाग जा, काबर कि मोला डर लागत हे, तोर प्यार के गहराई हा तोर हिरदे के दरवाजा ला मोर खातिर सदा के लिए बंद कर देय हे। कोनो सुरक्षित जघा म चल दे। का सच म तंय हा मोला बिना हिरदे के कोनो दूसर दुनिया म भेज देबे?’’
तभो ले जवान मछुआरा हा अपन आत्मा के एको बात ल नइ सुनिस। वोहर वो नन्हीं जलपरी ल पुकारिस अउ किहिस, ’’प्यार हा बुद्धि ले बढ़के हे, धन-दौलत ले जादा कीमती हे, अउ इंसानी बेटीमन के पांव ले जादा सुंदर हे। आगी हा येला जला नइ सके अउ पानी हा येला बुता नइ सके। मंय हा बिहिनिया तोला पुकारे रेहेंव फेर तंय हा नइ आयेस। चंदा हा घला तोर नाम ला सुनिस होही फेर तंय हा मोर कोती कोनो घ्यान नइ देयेस। मंय हा पापी हंव जउन तोला छोड़के चल दे रेहेंव, अउ दुनिया भर भटक के अपने नुकसान करेंव। तब घला तोर प्यार हा सदा मोर संग म रिहिस अउ सदा सच्चा रिहिस। मंय हा बुराई घला देखेंव अउ भलाई घला फेर तोर प्यार ला कोनो हा नइ हरा सकिस। अउ अब जब तंय हा मर चुके हस तब महू हा तोर संग मर जाहूँ।’’
वोकर आत्मा हा वोकर से उहाँ ले चले जाय बर बड़ बरजिस फेर वोहर नइ मानिस। वोकर प्यार हा बहुत गहरा अउ पूरा सच्चा रिहिस। समंदर हा अउ नियरात गिस अउ अपन लहरा ले वोला ढंके लगिस। जब वोला अनभो होइस के अब वोकर अंत करीब आ चुके हे तब वोहर अपन अधीर होठमन ले जलपरी के होठमन ला अउ चूमिस अउ विही पल वोकर हिरदे हा दू टुकड़ा म टूटके छरिया गिस। अउ जब असीम प्रेम ले भरे वोकर हिरदे हा टूट गिस तब वोकर आत्मा हा वोकर भीतर समा गिस अउ पहिली के समान वोकर संग एकाकार हो गिस। अउ तब समुद्र हा वो जवान मछुआरा ला अपन लहरामन म ढंक लिस।
0
दूसर दिन बिहिनिया पादरी हा समुद्र ला आशीर्वचन देय खातिर आइस काबर कि समुद्र हा अशांत हो गे रिहिस। वोकर संग भिक्षुक, संगीतकार, मोमबत्ती पकड़ने वाला, धूपदानी पकड़ने वाला अउ जनता के भीड़ घला आइस।
पादरी हा जब समुद्र तट म पहुँचिस तब देखिस कि जवान मछुआरा हा उहाँ मरे पड़े हे अउ वोकर बांह म नन्हीं जलपारी के मृत शरीर हे। पादरी हा गुस्सा होके पीछू हटत क्रास के निशान बनाइस अउ चिल्ला के किहिस, ’’न तो मंय हा समुद्र ला कोनो आशीर्वाद देंव अउ न वोकर भीतर रहवइया कोनो जीवमन ला। समुद्र के निवासीमन ला धिक्कार हे, अउ वो सबो झन ला घला धिक्कार हे जउनमन वोकर संग कोनो प्रकार के रिश्ता बनाथें। अउ जउन हा प्रेम के खातिर ईश्वर ला घला तियाग दिस अउ जउन हा ईश्वर के न्याय ले मारे गिस, वोहर अपन प्रेमिका संग इहाँ परे हे। वोकर अउ वोकर प्रेमिका के मृत शरीरमन ला इहाँ ले तुरंत हटाओ अउ वोमन ला ’फुलर्स फील्ड’ (धोबीमन के मैदान) के कोनो कोंटा म दफन कर देव। कब्र के ऊपर कोनो निशान या कोनो चिनहा झन बनाना। कोनो ला उंकर कब्र के जघा के बारे म पता झन चले। वोमन अपन जीवन म घला शापित रिहिन अउ मर के घला वोमन शापित रहिहीं।’’
जनता मन वइसनेच करिन जइसे कि पादरी के आदेश रिहिस। धोबी मैदान के एक बंजर अउ सुनसान कोना म जिहाँ कोनो फूल नइ फूले, वोमन कबर खोदिन अउ वो मृत शरीरमन ला दफना दिन।
जब तीसरा साल बीतिस तब एक पवित्र दिन में पादरी हा प्रार्थना स्थल म गिस ताकि वोहर जनता ला प्रभु के घावमन ला दिखा सके अउ वोमन ला प्रभु के क्रोध के बारे म बता सके।
जब वोहर अपन धार्मिक वस्त्रमन ला धारण करिस अउ भीतर जाके वेदी के आगू सिर नवाइस तब देखिस कि वेदी हा कुछ अनोखा फूलमन ले ढंकाय हे। वइसन फूल वोहर अपन जीवन म अउ कभू नइ देखे रिहिस। वो फूलमन देखे म अजीब अउ अद्भुत सुंदर रिहिन। उंकर सुंदरता हा पादरी के मन ला बेचैन कर दिस अउ वोकर मीठ-मीठ खुशबू हा वोकर नाक म भर गिस। वोला अजीब खुशी के अनुभव होइस फेर वोला कुछूच समझ नइ आइस कि वोहर अतका खुश काबर होवत हे।
येकर बाद वोहर पवित्र संदूक ला खोलिस, उहाँ रखे पात्र म सुगंधित धूप जलाइस, जनता ला पवित्र रोटी ला देखाइस, अउ तब वोमन ला पवित्र परदा के पीछू छिपा दिस। तब वोहर जनता ला उपदेश देय लगिस। वोकर उद्देश्य जनता ला ईश्वर के क्रोध के बारे म बताना रिहिस फेर सफेद फूलमन के सुंदरता हा वोकर चेत ला हर लिस अउ वोकर मीठ-मीठ महक हा वोकर नाक म बस गिस। वोकर मुँहू ले कुछू अउ दूसर वचन निकले लगिस। वोहर अब परमेश्वर के क्रोध के बारे म नहीं बल्कि वो परमेश्वर के वर्णन करे लगिस जेकर नम हे ’प्रेम’। अउ ये सब वचन वोकर मुँहू ले कइसे निकलिस तेला वो खुदे नइ जान सकिस।
पादरी हा जब अपन उपदेश ला पूरा करिस तब उहाँ हाजिर पूरा जनता रोय लगिस। पादरी हा वापिस अपन कक्ष म चले गिस। वोकर आँखीमन आँसू ले भरे रिहिन। उहाँ वोकर सहायक मन आइन अउ वोकर धार्मिक वस्त्रमन ल उतारे लगिन। वोमन वोकर चोंगा, कमरबंद अउ दूसर धार्मिक वस्त्रमन ला उतारिन। पादरी हा अइसे खड़े रिहिस मानो कोनो सपना देखत होय।
वस्त्र उतरे के बाद वोहर सहायकमन कोती देखिस अउ पूछिस, ’’वेदी के फूललमन कोन से फूल हरे अउ येला कहाँ ले लाय रेेहेव?’’
सहायकमन जवाब दिन, ’’हमन नइ जानन कि वोहर कोन से फूल हरे पर येमन ला धोबी के मैदान के कोना से लाय गे रिहिस।’’ ये सुनके पादरी हा कांप गिस। वोहर तुरते अपन घर लहुट गिस अउ प्रार्थना करे लगिस।
बिहिने-बिहने, जब पंगपंगावत रिहिस, वोहर भिक्षुक, संगीतकार, मोमबत्ती पकड़ने वाला अउ धूपदानी पकड़ने वाला अउ जनता के एक बड़े भीड़ के संग समुद्र के किनारा म गिस। वोहर समुद्र अउ समुद्र के भीतर रहवइया सबो प्राणीमन ला आशीर्वाद दिस। वोहर वनदेवता मन ला, अउ जंगल म नाचने वाले सबो जीवमन ला, अउ पत्तामन के ओधा म चमकने वाला चमकदार आँखी वाले सबो जीवमन ला आशीर्वाद दिस। जनता हा खुशी अउ आश्चर्य ले भर गिस।
तब घला धोबी मैदान के वो कोना म कोनो फूल नइ खिलिस अउ वोहर पहिली समान बंजर के बंजर बने रिहिस। समुद्र के निवासीमन घला वो तट म अउ कभू नइ आइन जिहाँ वोमन पहिली आवत रहंय। काबर कि वोमन अब समुद्र के कोनो दूसर हिस्सा म चल दे रिहिन।
000kuber000