सच्चा मित्र
अस्कर वाइल्ड
अनुवादक - कुबेर
बिहने-बिहने के बात हरे, एक ठन डोकरा पन-मुसुवा हा अपन बिला ले झांक के देखिस। वोकर आँखीमन मोती के समान चमकत रिहिन। कर्रा-कर्रा वोकर मेछामन सलेटी रंग के रिहिन अउ वोकर पूछी हा भारत के रबर के डोरी समान रिहिस।
तरिया म बत्तख के नान-नान लइकामन घला तंउरत रिहिन। वोमन पींयर कनोरी चिरई कस दिखत रिहिन। वोकर माँ हा, जउन हा झक सफेद रंग के रिहिस अउ वोकर पंवरीमन रकत-लाल रंग के रिहिन, वोमन ला पानी के ऊपर उलांडबाटी खाय के अउ मुड़ी के भार खड़े होय के तरकीब सिखावत रिहिस।
वोहर लइकामन ला घेरीबेरी कहत रहय ’’जब तक तुमन पानी में मुड़ी के भार खड़े होयबर नइ सीखहू तब तक समाज म कोनो हा तुंहर इज्जत नइ करही।’’ बीच-बीच म वोहर खुदे मुड़ी के भार खड़े होके देखाय। फेर वोकर लइकामन वोकर कोनो बात ऊपर धियान नइ देवंय। वोमन अभी अतका नादान रिहिन कि समाज के हिस्सा होय ले का फायदा होथे तेला जानतेच नइ रिहिन।
डोकरा पन-मुसुवा हा चिल्लाके किहिस, ’’कितना नालायक बच्चा हें।ं येमन ला तो पानी म बुड़ीच जाना चाही।’’
बत्तख हा किहिस, ’’वइसन बात नोहे डोकरा, नवा काम सीखे म समय लागथे। अउ माता-पिता ला धीरज रखना चाही।’’
पन-मुसुवा हा किहिस, ’’अरे! माता-पिता के मया-दुलार ला मंय का जानंव। मोर परिवार अउ बाल-बच्चा होतिस तब ना? सच बात कहंव तब, मंय हा कभू बिहावेच नइ करेंव अउ न अइसन कोनो इच्छा होइस। मोर मानना हे कि जिनगी म प्यार-मोहब्बत हा अपन जघा ठीक हे पन मित्रता हा वोकर ले बढ़के होथे। संसार म सच्ची अउ निस्वार्थ मित्रता हा सबले बढ़के होथे।’’
विही कना तरिया पार म विलो पेड़ के डारा म एक ठन लिनेट चिरई हा बइठे रहय। पन-मुसुवा अउ बत्तख के गोठ ला वोहर सुन डरिस। वोहर पूछिस, ’’अच्छा! तब बता तो एक सच्चा मित्र के का कर्तव्य होना चाही?’’
बत्तख हा किहिस, ’’हाँ! बता तो भला, महू जानना चाहथंव।’’ अउ वोहर लइकामन संग तंउरत तरिया के दूसर पार कोती चल दिस अउ अपन लइकामन ला सिखाय बर पानी म मुड़ी के भार खुदे खड़ा हो गिस।
पन-मुसुवा डोकरा हा किहिस, ’’एकदम बेकार के सवाल करथस। अरे! मंय तो इही चाहहूँ कि मोर मित्र हा मोर प्रति समर्पित रहय।’’
वो नान्हे चिरई जउन हा पतला असन डारा म बइठके झूलत रिहिस, अपन डेनामन ला फड़फड़के पूछिस, ’’अउ बदला म तोला कइसन बेवहार करना चाही?’’
’’मोला तोर बात हा समझ म नइ आइस।’’ पन-मुसुवा हा किहिस।
’’तब चल, मंय हा एकर बारे म एक ठन कहानी सुनावत हंव।’’ लिनेट चिरई हा किहिस।
’’का येहर मोर बारे म हे?’’ पन-मुसुवा हा पूछिस, ’’तब तो मंय हा जरूर सुनहूँ। कहानी सुने म मोला बहुत आनंद आथे।’’
’’येहर सब बर लागू होथे।’’ लिनेट हा किहिस। तब वोहर खाल्हे उतर के मुसुवा कना बइठ गिस अउ वोला ’एक सच्चा मित्र’ नाम के कहानी सुनाय लगिस।
’’एक समय के बात हरे,’’ लिनेट हा किहिस, ’’बहुत समय पहिली के बात हरे, हंस नाम के एक झन बहुत गरीब, ईमानदार अउ सीधा-सादा, बुटरा आदमी रिहिस।’’
’’वोहर बहुत खास अउ प्रसिद्ध रिहिस का?’’ पन-मुसुवा हा पूछिस।
’’नहीं!’’ लिनेट हा किहिस, ’’मोला नइ लगय कि वोहर बहुत खास अउ प्रसिद्ध आदमी रिहिस। बस, वोहर बहुतेच दयालु रिहिस। वोकर चेहरा हा गोल-मटोल, प्यारा अउ हँसमुख रिहिस। वोहर एकठन नानचुक झोपड़ी म रहय अउ दिनभर अपन बगीचा म काम करय। पूरा अतराब म वोकर बगीचा जइसन सुंदर अउ ककरो बगीचा हा नइ रिहिस। उहाँ स्वीट-विलियम, गिली-फ्लावर्स, शेफर्ड्स-पर्स अउ फेयर-मेड्स ऑफ फ्रांस जइसन कतरो फूल बारों महीना फूले रहंय। लाल, पींयर, बैंगनी, नाना प्रकार के गुलाब रिहिन। इंकर अलावा क्रोकस, वायलेट्स, कोलम्बाइन, लेडीस्मॉक, मार्जोरम, जंगली तुलसी, काउस्लिप, फ्लावर-डी-ल्यूस, डैफोडिल अउ क्लोव-पिंक जइसन फूल घला रहंय। एक पौधा हा झरतिस तब दूसर हा फूल जातिस। अपन-अपन दिन-बादर के मुताबिक बारों महीना कोनो न कोनो फूल फूलेच रहय। ये तरह ले उहाँ सदा सुंदर-सुंदर फूल फूलेच रहंय। वोकर बगीचा हा बारों महीना बड़ सुंदर दिखत रहय। सदा मस्त खुशबूदार हवा चलत रहितिस।
’’वइसे तो छुटकू हंस के कोरी-खरका संगवारी रिहिन फेर वोकर सबले जादा पक्का मित्र रिहिस आटा चक्की वाले मिलर ह्यू हा।
असल में अमीर मिलर हा गरीब हंस ला अतका चाहे कि जब कभी वोहर वो कोती आवय तब वोहर वोकर बगीचा मा हाजिरी जरूर लगावय। बगीचा ले गुच्छा-गुच्छा फूल नइते खुशबूदार जड़ी-बूटी टोर लेवय। फल के मौसम होतिस तब झोला भरके वोहर आलू बुखारा अउ चेरी टोर लेतिस।
’’मिलर हा सदा इही कहय, ’’सच्चा मित्र के बीच कोनो दुराव नइ होना चाही। एक के पास जउन हे वोहर दुनों के होना चाहीे।’’ गरीब हंस ह मुड़ी नवा के हाँस देवय। मिलर के अइसन उच्च विचार सुनके वोहर वोकर ऊपर सदा गर्व करय।
पड़ोसीमन ला कभू-कभू ये बात हा बड़ अजीब लगय। अतका अमीर मिलर, जेकर आटा मिल म हमेशा सैकडा़ें बोरी आटा के पड़े रहय, छै ठन दुधारू गाय, अउ बरदी भर भेड़ रिहिस तउन हा बदला म वोला कुछुच नइ देवय। फेर हंस हा पड़ेसीमन के बात ऊपर कभू ध्यान नइ देवय। अउ जब मिलर अउ वोकर निस्वार्थ अउ सच्ची मित्रता के बारे म ककरो ले अच्छा-अच्छा बात सुनतिस तब वोला गजब आनंद आतिस। वोहर गजब खुश हो जातिस।
अइसने गरीब हंस हा अपन बगीचा म काम करत अपन दिन ला बितातिस। बसंत, गर्मी अउ पतझड़ के मौसम म वोहर बहुत खुश रहितिस। फेर जब जड़कला के दिन आतिस, बगीचा म बजार म बेंचे बर कोनो फूल अउ फल नइ होतिस तब वोकर तकलीफ के दिन शुरू हो जातिस। कतरो रात तो वोहर सुखाय नाशपाती अउ अटर्रा मेवामन ला खाके सुत जातिस। जड़कला म एकदम वोहर अकेल्ला हो जातिस; काबर ये समय मिलर हा कभू वोकर ले मिले बर नइ आवय।
मिलर हा अपन घरवाली ले कहय, ’’जब तक बर्फ जमे हे तब तक गरीब हंस ले मिले खातिर जाय म कोनो फायदा नइ हे। कोनो आदमी ऊपर जब मुसीबत आ जाय तब वोला अकेल्ला छोड़ देना चाही न कि मेहमान बनके वोला अउ परेशान करना चाही। मित्रता के बारे म मोर अइसने विचार हे। अउ मोला विश्वास के कि मंय हा एकदम सही कहत हंव। इही पाय के मंय हा बसंत आय के अगोरा करहूँ अउ तब वोकर ले मिले खातिर जाहूँ। तभे तो वोहर मोला प्रिमरोज फूल के बड़े असन टुकनी भरके दे सकही अउ तभे तो वोला आनंद आही।’’
वोकर घरवाली हा किहिस, ’’तंय हा सच म दूसरमन के गजब चिंता करत रहिथस।’’ वोहर पाइन लकड़ी के अंगीठी कना अपन आराम कुर्सी ऊपर बइठे रिहिस। आगू किहिस, ’’एकदम सही बात केहेस तंय हा। मित्रता के बारे म सुनना मोला सच म बहुत अच्छा लगथे। मोला यकीन हे कि पादरी साहब हा घला अतका अच्छा बात नइ बोल सकय, का होइस कि वोहर तिमंजिला महल म रहिथे अउ अपन अंगरी म सोन के मुंदरी पहिनथे।’’
’’का हम गरीब हंस ला इहाँ अपन पास नइ बुला सकन?’’ मिलर के सबले छोटे बेटा हा किहिस, ’’अगर बिचारा हंस हा मुसीबत म हे तब मंय हा वोला अपन आधा दलिया ला दे देहूँ अउ वोला मंय हा अपन सफेद खरगोश ला देखाहूँ।’’
’’कितना नासमझ लइका हस तंय हा?’’ मिलर हा गुस्सा म चिलाइस। ’’मोला समझ नइ आवत हे कि तोला स्कूल भेजे के का फायदा होवत हे। लगथे कि स्कूल म तंय हा कुछुच नइ सीखस। देख, हंस हा कहूँ इहाँ आ जाही तब वोहर हमर अंगीठी ला देखही। हमन ला बढ़िया-बढ़िया खावत देखही, लाल शराब के बड़े टीपा ला देखही, तब वोला हमर ले जलन होही। अउ ककरो ले जलना बहुत खराब चीज होथे। येहर आदमी के सुभाव ला बिगाड़ देथे। अउ मंय हा थोरको नइ चाहंव कि हंस के सुभाव म खराबी आय। मंय हा वोकर सबले बढ़िया दोस्त हरंव अउ सदा वोकर फिकर करथंव अउ सदा इही कोशिश करत रहिथंव कि वोहर कभू गलत रद्दा म झन जाय। अउ वोहर कहूँ इहाँ आइच गिस तब हो सकथे कि वोहर मोर ले उधार म आटा मांग लेय। मंय हा वोला कभू उधार म आटा नइ दे सकंव। आटा अपन जघा हे अउ दोस्ती हा अपन जघा। दुनों ला आपस म मिलाना उचित नइ हे। देख, दुनों शब्द के स्पेलिंग अलग हे अउ उंकर अर्थ हा घला अलग हे। ये बात ला तो कोनो हा समझ सकथे।’’
’’वाकई तंय हा गजब सुंदर बात करथस,’’ मिलर के घरवाली हा किहिस अउ अपन खातिर एक ठन गिलास म गरम शराब उंडेलिस। ’’सच म मोला तो अब नींद आवत हे। अइसे लगत हे कि मंय हा गिरिजा घर म बइठे हंव।’’
’’बहुत आदमी मिलहीं जउनमन अच्छा काम तो करत रहिथें,’’ मिलर हा जवाब दिस, ’’फेर बहुत कम मिलथें जउनमन अच्छा बात घला कर सकथें। येकर ले जाहिर हे कि अच्छा बात करना, अच्छा काम करे ले जादा मुश्किल होथे। अच्छा बात करना बेहतर होथे।’’ तब वोहर मेज म बइठे अपन छोटे बेटा ल गुरेर के देखिस। लड़का हा शरमा के अपन मुड़ी ला नवा लिस। वोकर चेहरा हा शरम के मारे ललिया गिस अउ अपन चाय ला पीयत-पीयत वोहर रो डरिस। खैर, अभी वोहर नादान हे तउन पाय के वोला माफ करे जा सकथे।
’’का कहानी हा खतम हो गिस?’’ पन-मुसुवा हा पूछिस।
’’कइसे खतम हो जाही?’’ लिनेट हा जवाब दिस। कहानी तो अभी शुरू होवत हे।
’’तब तो तोला कहानी कहे ला नइ आवय।’’ पन-मुसुवा हा किहिस, ’’आजकल अच्छा कहानीकार मन अपन कहानी ला अंत ले शुरू करथें तब शुरुआत म आथें। आखिर म बीच के हिस्सा ला सुनाथें। कहानी कहे के इही हा नवा तरीका हरे। कुछ दिन पहिली मंय हा एक आलोचक ला अइसने कहत सुने रेहेंव। वोहर एक नवजवान संग तरिया पार म टहलत रिहिस। वोमन येकर बारे म बड़ लंबा-चैड़ा बात करत रिहिन। अउ मोला विश्वास हे के वोहर सहिच कहत रिहिस। वोहर नीला रंग के कांचवाला चश्मा पहिरे रिहिस अउ वोहर टकला रिहिस। जब कभू वोहर नौजवान ले कोनो सवाल पूछतिस तब नवजवान हा ’पूह’ कहिके चुप हो जातिस। खैर तंय हा अपन कहानी ला सुना, आगू का होइस। मोला तो मिलर के काम हा पसंद आवत हे। मोरो मन म कतरो सुंदर-सुंदर विचार हे। इही पाय के मोला वोकर ले हमदर्दी हे।’’
’’तब,’’ लिनेट हा फुदक के किहिस, ’’जड़कला हा जइसने खतम होइस, प्रिमरोज के पौधामन म हल्का पींयर रंग के फूल चंदैनी सरीख चरचर ले फूले लगिन। मिलर हा अपन घरवाली ले किहिस, ’आज मंय हा हंस बोठवा संग मिले खातिर जावत हंव।’’
’’अरे! तंय कितना दयालु हस।’’ वोकर घरवाली हा किहिस,, ’’सदा दूसर के भलाई के बात सोचत रहिथस। अउ देख, फूल लाय बर वो बड़े टुकनी ला लेग जाबे, भुलाबे झन।’’
विही पाय के मिलर हा पवन चक्की के पंखुड़ी मन ला लोहा के मजबूत सांकल म बांध दिस अउ बड़े जबर टुकनी धर के हंस करा जायबर अपन पहाड़ीवाले घर के खाल्हे उतर गिस।
0
’’गुडमार्निंग, मोर छुटकू संगवारी।’’ मिलर हा किहिस।
’’गुडमार्निंग,’’ हंस हा अपन रापा ला धरत-धरत खुश होके खिलखिला के हँासत किहिस।
’’जड़कला हा बने मजा-मजा म बीतिस?’’ मिलर हा पूछिस।
’’अरे! झन पूछ।’’ हंस हा किहिस, ’’तंय हा पूछेस, इही म मोला खुशी होइस, सच म बहुत खुशी होइस। सच बतांव संगवारी तब एसो के जड़कला हा बहुतेच मुश्किल म बीतिस। फेर अब तो बसंत के मौसम आ गिस न, मंय हा बहुत प्रसन्न हंव। मोर बगीचा के सबो पेड़मन म अच्छा-अच्छा फूल फूले के शुरू हो गे हें।’’
’’जड़कला भर हमन तोर बर अघात फिकर करन रेहन,’’ मिलर हा किहिस, ’’अउ सोचन कि तोर समय हा कइसे बीतत होही।’’
’’आपमन बहुत दयालु हव,’’ हंस हा हाँस के किहिस, ’’मंय तो डरावत रेहेंव कि कहूँ आपमन मोला भुला गे होहू।’’
’’हंस! तोर बात सुनके मोला हैरानी होवत हे।’’ मिलर हा किहिस, ’’मित्रता हा कहूँ भुलाय के चीज हरे भला? इही हा तो मित्रता के सबले सुंदर बात हरे। फेर मोला लगथे कि तंय हा जीवन के ये सुंदर बात ला नइ समझस। वइसे तोर बगीचा म प्रिमरोज के कितना सुंदर-सुंदर फूल फूले हे।’’
’’हाँ, वाकई येमन बहुत सुंदर हें,’’ हंस हा किहिस, ’’अउ ये सब मोर बर सौभाग्य के बात हे। बजार लेग के येला मंय हा बर्गोमास्टर के बेटी तीर बेंच देहूँ अउ जउन पइसा मिलही वोकर ले मंय हा मोर एकचकिया हाथ ठेला ला वापिस खरीद लेहूँ।’’
’’अपन हाथ ठेला ला वापिस खरीद लेबे? तोर केहे के मतलब? कहूँ ये तो नहीं कि तंय हा वोला बेंच देय हस? कितना मूरखता के बात हे।’’
’’असल में बात अइसन हरे,’’ हंस हा किहिस, ’’वोला मोला बेचनच पड़ गिस। जड़कला म मंय हा भारी तकलीफ सहे हंव। मोर कना रोटी खरीदे बर फूटी कौड़ी नइ रिहिस। पहिली मंय हा अपन इतवार के दिन पहिने के कोट के चांदी के बटन ला बेंचेंव। फेर अपन चांदी के माला ला। वोकर बाद अपन बड़ेवाला पाइप ला अउ आखिर म मोला अपन हाथ ठेला ला बेचनाच पड़ गिस। फेर अब मंय हा वो सबमन ला वापिस खरीद लेहूँ।’’
’’हंस,’’ मिलर हा किहिस, ’’मंय हा तोला अपन हाथ ठेला ला दे देहूँ। वोहर अभी अच्छा हालत में हे। बस वोकर चक्का के एक-दू ठन स्पोकमन टूट गे हें अउ वोकर पीछू हिस्सा हा कुछ खराब हो गे हे। तभो ले मंय हा वोला तोला दे देहूँ। मंय जानथंव कि येहर मोर उदारता होही अउ मोला अइसन करत देख के कतरो झन मोला बेवकूफ समझहीं। फेर मोर मानना हे कि अइसने उदारता हा सच्ची मित्रता के असली पहिचान हरे। अउ वइसे भी मंय हा मोर बर नवा हाथ ठेला खरीद डरे हंव। तब तंय हा बिलकुल फिकर झनकर। मंय हा वो हाथ ठेला ला जरूर तोला दे देहूँ।’’
सच म आप बहुत दयालु हव,’’ हंस हा किहिस। वोकर लाल चेहरा हा खुशी के मारे चमक गिस। ’’मंय हा वोला आराम से सुधार लेहूँ काबर कि वोकर लायक मोर घर म लकड़ी के एक ठन पटनी घला माड़े हे।’’
’’लकड़ी के पटनी!’ मिलर हा बोलिस, ’’अरे, मोला अपन बियारा के खोली बर येकरेच जरूरत रिहिस। वोकर छत म छेदा हो गे हे। वोला नइ मूंदहूँ ते औंउसाके सब अनाज हा सर जाही। कतका अच्छा होइस कि तंय वोकर बारे म मोला बतायेस। भलाई के एक काम करे ले दूसर के अवसर मिलिच जाथे। मंय हा तोला अपन ठेला गाठी ला देवत हंव अउ तंय हा मोला लकड़ी के पटनी ला। वइसे ठेला गाड़ी के कीमत हा पटनी ले जादाच होथे। फेर दोस्ती म अइसन छोटे-मोटे हिसाब के कोनो लेखा नइ होना चाही। जल्दी वो पटनी ला निकाल। मंय हा आजेच मोर बियारा वाले खोली के मरम्मत करवाय के काम शुरू कर देहूँ।’’
’’बिल्कुल!’’ छोटे हंस हा किहिस। वोहर तुरते लकड़ी टाल म गिस अउ खींचत-खींचत पटनी ला ले आइस।
’’वइसे ये पटनी हा जादा बड़े नइ हे,’’ मिलर हा वोला अंदाजत किहिस, ’’अउ मोला डर हे कि येहर बियारा खोली के भुलका बर छोटे मत पर जाय। अउ तोर ठेला गाड़ी के मरम्मत करे बर घला तोर कना कुछू नइ बांचही। फेर येमा मोर कोनो गलती नइ हे। अब मंय हा तोला अपन ठेला गाड़ी ला तो देइच देंव समझ। तब तंय हा मोला थोर-बहुत फूल देबे कि नहीं? ये ले टुकना अउ येला पूरा भरके ले आ।’’
’’ऊपर तक पूरा?’’ नान्हे हंस हा तनिक उदास होके पूछिस, काबर वो टुकनी हा बड़ जबर रिहिस। पूरा टुकनी भरे के बाद बजार लेगे बर वोकर कना कुछुच नइ बाचतिस। तब वोहर अपन चांदी के बटन ला वापिस कइसे खरीद सकही। अउ अपन चांदी के बटन बर वोकर मन हा अधीर होवत रिहिस।
’’देख भाई,’’ मिलर हा वोकर मन के दुविधा ला भांपके किहिस, ’’मंय हा तोला अपन ठेला गाड़ी ल तो देइच देंव, तब तोला एक कनिक फूल घला नइ मांग सकंव जी। का गलत कहि परेंव? मंय तो इही सोचत रेहेंव कि दोस्ती, मतलब सच्ची दोस्ती म स्वार्थ बिलकुल नइ होना चाही।’’
’’मोर मयारुक संगवारी, मोर सबले बढ़िया संगवारी। मोर फुलवारी के जम्मों फूलमन तोरेच ताय। मोला अपन चांदी के बटन ले जादा फिकर तोर अनमोल सलाह के हे।’’ वोहर दंउड़त फुलवारी म गिस अउ प्रिमरोज के जम्मो सुंदर-सुंदर फूलमन टोर के मिलर के टुकनी म भर के ले आइस।
’’गुड बाय छुटकू हंस!’’ मिलर हा किहिस। खांद म पटनी ला बोही के अउ हाथ म टुकनी ला उठाके वोहर अपन घर वाले पहाड़ी कोती चले लगिस।
’’गुडबाय!’’ नान्हें हंस हा किहिस अउ मगन होके अपन बगीचा के माटी ला कोड़े लगिस, काबर कि वोहर ठेला गाड़ी पाके बड़ खुश हो गे रिहिस।
0
आगू दिन जब वोहर परछी के देवालमन म हनीसकल के नारमन ला चढ़ावत रिहिस तभे सड़क म वोला मिलर के आवाज सुनाई दिस। वोहर निसैनी ले तुरते उतरिस, भागत बगीचा म गिस अउ उचक के दीवाल के वोपार देखे लगिस। उहाँ पीठ म एक बोरी आटा लादे मिलर हा खड़े दिखिस।
’’हंस, मोर मयारुक संगवारी,’’ मिलर हा किहिस, ’’का मोर आटा के ये बोरी ला बजार तक पहुँचा सकथस?’’
’’ओहो, मोला बहुत दुख हे,’’ हंस हा किहिस, ’’आज मोला बिकट काम हे संगवारी। फूल के नारमन ला दिवार म चढ़ाना हे। फूलमन म पानी पलाना हे। बन-झार के निंदाई करना हे।’’
’’सच कहत हस?’’ मिलर हा किहिस, ’’मंय सोचथंव कि जब मंय हा तोला अपन ठेला गाड़ी ला देवत हंव, तब तोर अइसन बहाना बनाना सच्ची मित्रता के खिलाफ हे।’’
’’अरे! नहीं, ना। अइसन झन बोल,’’ हंस हा किहिस, ’’मंय हा कभू ककरो संग गलत बेवहार नइ करंव।’’ तब वोहर दंउड़के अपन टोपी ला लानिस अउ आटा के वो बोरी ला अपन खांद म लाद के चले लगिस।
वो दिन बहुतेच गरमी पड़त रिहिस। सड़क म धुर्रा उड़त रिहिस। अभी हंस हा छै मील घला नइ चले रिहिस कि वोहर लस खा गिस। वोहर बइठके थोरिक सुस्ताइस। तभो ले वोहर हिम्मत नइ हारिस। आगू बढ़त गिस अउ आखिरकार बजार पहुँच गिस।
0
’’आज के दिन हा बड़ मुश्किल म बीतिस। थकासी के मारे अल्लर हो गे हंव।’’ खटिया म ढलंगत वोहर खुद से किहिस, ’’फेर मोला खुशी हे कि मिलर के बात ला नइ टालेंव। काबर कि वोहर मोर सबले बढ़िया संगवारी हरे। अउ वोहर अपन हाथ गाड़ी ला देने वाला घला हे।’’
दूसर दिन बिहिनियाच ले अपन आटा के पइसा लेय बर जाना हे कहिके मिलर हा अउ आ गिस। छुटकू हंस हा अतका थक गे रिहिस कि वोहर सुतके उठेच नइ रिहिस।
’’सच कहंव,’’ मिलर हा किहिस, ’’हंस! तंय हा बहुत आलसी हो गे हस। देख! जब मंय हा तोला अपन ठेला गाड़ी ला देनेच वाला हंव तब तोला घला कुछू मेहनत करना चाही न? आलस हा एक बहुत बड़े पाप हरे अउ येहर मोला थोरको पसंद नइ हे कि मोर कोनो मित्र हा आलसी या सुस्त होय। खराब झन समझबे, मंय हा साफ-साफ कहने वाला आदमी हरंव। कहूँ तंय हा मोर मित्र नइ होतेस ते मंय हा अइसन काबर बोलतेंव। फेर अइसन दोस्ती के घला का फायदा कि इंसान हा अपन मन के बात ला घला न कहि सके? कोनो पराया हा मीठ-मीठ बात करके, चापलूसी करके खुश करे के कोशिश कर सकथे फेर एक सच्चा मित्र विही हरे जउन हा सामने म करू अउ सच बात कहि देय, भले चाहे सामनेवाला ला बुरा लग ते लगे। एक सच्चा दोस्त हा अइसनेच कहना पसंद करही। काबर कि वोहर जानथे कि इही म मित्र के भलाई हे।’’
’’मोला बहुत दुख हे,’’ छुटकू हंस हा अपन आँखीमन ला रमजत अउ अपन टोपी ला निकालत किहस, ’’मंय हा बहुतेच थक गे रेहेंव। बिहने-बिहने मन करिस कि सुते-सुते थोरिक देर चिरईमन के चहकना ला सुन लेतेंव। तोला पता हे, चिरईमन के चांव-चांव ला सुने ले मोर थकवाट हा मिट जाथे अउ मंय हा जादा अच्छा ढंग ले काम कर सकथंव।’’
’’चलो, अच्छा हे,’’ मिलर हा हाँसके अउ हंस के पीठ ला थपथपावत किहिस, ’’तब अब जल्दी उठ अउ मोर चक्की म चल। उहाँ मोर कोठार वाले खोली के छत के मरम्मत कर देबे।’’
बिचारा छुटकू हंस के बगीचा म कतनो काम परे रिहिस अउ वोमन ला निपटाय के वोला अघात फिकर रिहिस। दू दिन हो गे रिहिस, फूल के डोहरीमन म पानी पलाय नइ रिहिस। फेर वोहर मिलर ला मना घला कइसे करतिस। वोहर वोकर सबले अच्छा मित्र रिहिस न। झिझकत किहिस, ’’संगवारी! आज मोला बहुत काम हे। देख बुरा झन मानबे।’’
’’अरे, सच में,’’ मिलर हा किहिस, ’’बहुत भारी काम तो नइ तियारत हंव, अउ फेर मंय हा तोला अपन ठेला गाड़ी ला देनेच वाला हंव ना। फेर देख, तोला मोर काम नइ करना हे ते झन कर। मंय हा खुदे कर लेहूँ।’’
’’अरे नहीं! अइसे बिलकुल नइ हो सके।’’ हंस हा किहिस अउ वोहर तुरंत खटिया ले कूदिस, कपड़ा पहिनिस अउ मिलर के बियारा कोती चल दिस। उहाँ वोहर दिन भर काम करिस, बेर बूड़त ले। संझा होय के बाद काम देखे बर मिलर हा अइस।
’’हंस, मितान! का तय हा छत के भुलका ला सुधार डरेस।’’ मिलर हा खुश होके पूछिस।
निसैनी ले उतरत हंस हा किहिस, ’’हा! बिलकुल ठीक कर देंव।’’
’’वाह! दूसर के काम करे ले बढ़ के खुशी अउ कोनो काम म नइ होय। ठीक कहत हंव कि नहीं?’’ मिलर हा किहिस।
’’आपके बात सुनना सचमुच मोर सौभाग्य के बात हरे।’’ हंस हा बइठ के पसीना पोंछत किहिस। ’’सच म बहुत बड़े सौभाग्य। मंय सोचथंव कि मोर मन म अइसन नेक विचार काबर नइ आय जइसन के तोर मन म आथे।’’
’’फिकर झन कर, जरूर आही,’’ मिलर हा किहिस, ’’तोला सिखाय बर मोला अभी अउ मेहनत करे बर पड़ही। अभी तो तंय हा सिरिफ दोस्ती निभाय बर सीखे हस। मौका आही तब तोला मंय हा दोस्ती के सिद्धांत ला घला समझाहूँ।’’
’’का, सच कहत हस?’’ छोटकू हंस हा पूछिस।
’’तंय फिकर झन कर,’’ मिलर हा किहिस, ’’सच कहत हंव। मोर छत ला तो तंय सुधारिच देस। अब जा घर, अउ अच्छा आराम से सुत। काबर कि काली मोर भेड़मन ला चराय बर तोला पहाड़ी म जाना हे।’’
बिचारा गरीब हंस। संकोच अउ डर के मारे वोहर कुछू नइ कहि सकिस।
दूसर दिन बिहिनियाच ले मिलर हा अपन भेड़मन ला धर के हंस के झोपड़ी म पहुँच गिस। हंस हा वोमन ला हंकालत पहाड़ कोती निकल गिस।
उहाँ जाय अउ आय म पूरा दिन बीत गिस। अउ जब वोहर अपन घर लहुटिस तब वोहर अतका थक गे रिहिस कि कुर्सी म बइठते सात वोला नींद आ गिस। बिहिनिया वोहर सुत के उठिस तब तक बेरा हा चढ़ गे रिहिस।
खुश होके वोहर मनेमन किहिस, ’आज चिभिक लगा के मय हा अपन बगीचा म काम करहूँ।’’
फेर अइसन कभू नइ हो सकिस। अपन बगीचा म काम करे के मौका वोला कभू नइ मिलिस। कोनो न कोनो ओखी करके मिलर हा रोज आ धमकतिस। कोनो न कोनो काम बता के वोला दुरिहा-दुरिहा भेज देतिस। कुछू नहीं ते मदद के ओखी वोला अपन आटा मिल म बला लेतिस। बिचारा हंस हा कभू-कभू एकदम उदास हो जातिस। बगीचा हा उजड़ झन जाय ये सोच के वोहर डर जातिस। फेर वोहर खुद ला समझातिस कि मिलर हा वोकर सबले बढ़िया दोस्त हरे। अउ वोहर अपन हाथ गाड़ी ला तो देनेच वाला हे। अइसन मददगार मित्र अउ कहाँ मिलही।
0
गरीब हंस ला मिलर के अइसने बिगारी करत दिन बितत गिस। मिलर हा हंस ला मित्रता के बारे म बहुुत सुदर-सुदर बात बताय। हंस हा सबो ल अपन कापी म लिख लेय अउ रातकुन वोला पढ़य। पढ़ाई-लिखाई म वोहर बहुत चंट रिहिस।
एक दिन सांझ कुन हंस हा आगी तापत अपन अंगीठी कना बइठे रिहिस। तभे वोकर घर मुहाटी के संकरी हा जोर से खड़खिड़ाय लगिस। मौसम हा बिकट खराब हो गे रिहिस। जोर के हवा चलत रिहिस। सब जिनिसमन उड़ात रिहिन। बिकट जोर से आवाज होवत रिहिस। हंस हा सोचिस कि बड़ोरा मा संकरी हा बाजत होही। फेर संकरी हा सरलग बजते रिहिस। पहिली ले जादा जोर से।
’’कोनो रद्दा रेंगइया होही।’’ हंस हा सोचिस, दंउड़ के गिस अउ मुहाटी ला खोलिस।
उहाँ मिलर हा खड़े रिहिस। वोहर एक हाथ म मुड़ भर के लउठी अउ दूसर हाथ म बरत कंडील धरे रिहिस।
’’बखत परे म काम आवइया मोर सबले बड़े संगवारी हंस!’’ मिलर हा किहिस, ’’मोर छोटे बेटा हा सिढ़िया ले गिर गे हे अउ मंय हा डाॅक्टर बलाय बर जावत हंव। फेर वोकर घर हा बहुत दुरिहा हे। मौसम हा घला बिकट खराब हे। अच्छा होतिस कि मोर बदला तंय हा डाॅक्टर बलाय बर चल देतेस? तोला सुरता हे कि नहीं, मंय हा तोला अपन हाथ गाड़ी ला देने वाला हंव? मुसीबत के समय मोर मदद करे के तोरो फरज बनथे ना?’’
’’बिलकुल,’’ छुटकू हंस हा किहिस, ’’ये तो बड़ पुण्य के काम होही। मोर कना मदद बर आयेस, मोर कद हा बाढ़ गिस। मंय अभी जावत हंव। फेर तंय हा अपन कंडील ला मोला दे दे। रात के समय। घुप अंधियार हे। कोनो गडढा म झपा झन जांव।’’
’’नहीं, नहीं हंस, मोला छिमा कर दे’’ मिलर हा किहिस, ’’येला आजेच खरीदे हंव। गिरगुरा के टूट जाही ते मोर बहुत नुकसान हो जाही।’’
’’बने कहत हस, मंय हा बिना कंडील के चल देथंव,’’ नान्हे हंस हा किहिस। वोहर अपन सबले गरमवाला फर के कोट ला पहिरिस, मुड़ी म गरम टोपी पहिरिस, नरी म मफलर ला लपेटिस अउ निकल गिस।
भयंकर तूफान चले लगिस। घुप अंधियारी रात। बिचारा हंस ला कुछू नइ दिखय। हवा अतका तेज रिहिस कि खड़ा होना तको मुशिकल होगे रहय। हंस हा बिकट हिम्मतवाला रिहिस। तीन घंटा चले के बाद वोहर डाॅक्टर के घर पहुँचिस अउ कपाट के संकरी ला खटखटाइस।
’’कोन हरे?’’ डाॅक्टर हा अपन सुते के खोली ले चिल्ला के पूछिस।
’’डाॅक्टर साहब! मंय छोटू हंस।’’
’’का काम हे छुटकू हंस?
’’मिलर के बेटा हा सिढ़िया ले गिर गे हे अउ वोला मार लगे हे। मिलर हा आप ला अभीच बलाय हे।’’
’’ठीक है,’’ डाॅक्टर हा किहिस। वोहर अपन घोड़ा ला तइयार करवाइस। अपन बड़े पनही ला पहिनिस। कंडील रखिस अउ घोड़ा म सवार होके मिलर घर जाय के रद्दा म चले लगिस। हंस बिचारा हा वोकर घोड़ा के पीछू-पीछू दंउड़े लगिस।
तूफान के गति हा अउ बाढ़ गिस। मूसलाधार पानी गिरे लगिस। हंस ला कुछू दिखे नहीं। कहाँ जावत हे यहू वोला समझ नइ आवत रिहिस। घोड़ा हा अगवा गे रिहिस।
आखिर म वोहर रस्ता भुला गिस अउ दलदली मैदान कोती निकल गिस। ये जघा हा जानलेचा रिहिस। गहरा-गहरा गड्ढा रिहिन। बिचारा हंस हा एकठन दलदली गड्ढ़ा म गिर गिस। दूसर दिन चरवाहामन वोकर लाश ला पानी के एक ठन बड़े जबर गड्ढा म पानी ऊपर तंउरत देखिन। लाश ला निकाल के वोमन वोकर झोपड़ी म लेगिन।
छुटकू हंस हा बड़ नामी आदमी रिहिस। वोकर मिट्टी म सब सकला गिन। वोकर काठी म मिलर हा सबले आगू रिहिस।
’’मंय हा वोकर सबले अच्छा संगवारी रेहेंव,’’ मिलर हा किहिस, ’’इही पाय के सबले आगू चले के मोर हक बनथे।’’ वोहर लंबा करिया रंग के लबादा पहिरे रिहिस अउ शव यात्रा म सबले आगू चलत रिहिस। बीच-बीच म वोहर अपन आँखीमन ला उरमाल म पोंछत रहय।
अंतिम संस्कार के बाद जब सब झन सुस्ताय खातिर सराय म बइठके मसालावाला शराब पीयत रिहिन अउ मीठवाले केक खावत रिहिन तब लोहार हा किहिस, ’’छुटकू हंस के अकाल मौत हम सबके खातिर एक बड़े नुकसान बरोबर हे।’’
’’मोर बर तो येहर अउ बहुत भारी नुकसान हरे।’’ मिलर हा किहिस। ’’अरे! मंय हा तो वोला अपन हाथ गाड़ी तको ला देने वाला रेहेंव। अब मोला समझ में नइ आवत हे कि वो हाथ गाड़ी के मंय हा का करंव। अबड़ अकन जघा छेंक के फालतू मोर घर म पड़े हे। वोकर मरम्मत कराय म बड़ खर्च आही अउ बिना मरम्मत कराय बेंचबे ता एको पइसा हाथ नइ आही। अब मंय हा कोनो ल कुछूच नइ देंव। ये बात के सदा ध्यान रखहूँ। कोनो ला दान देय म घला बड़ तकलीफ उठाय बर पड़थे।
0
अतका कहिके लिनेट हा चुप हो गिस।
’’तब आगू का होइस?’’ बहुत देर चुप रेहे के बाद पन-मुसुवा हा तिखारिस।
’’कहानी खतम हो गिस।’’ लिनेट हा किहिस।
’’अउ मिलर के का होइस?’’ पन-मुसुवा हा फेर तिखारिस।
’’मोला नइ पता।’’ लिनेट हा किहिस। ’’अउ मोला वोकर कोनो चिंता घला नइ हे।’’
’’तंय तो बिकट निरदई आदमी हरस।’’ पन-मुसुवा हा वोला धिक्कारिस।
’’मोला लगथे कि तंय हा ये कहानी के मरम ला समझ नइ पायेस।’’ लिनेट हा किहिस।
’’का केहेस?’’ पन-मुसुवा हा झल्ला के जोर से पूछिस।
’’कहानी के सीख।’’
’’तोर केहे के का मतलब हे? अरे ये कहानी म सीख जइसे कोनो बात हे?’’
’’बिलकुल हे।’’ लिनेट हा किहिस।
’’अरे! सच में।’’ पन-मुसुवा हा गुस्साके किहिस, कहानी शुरू करे के पहिलिच तोला ये बात ला बता देना रिहिस। पहिली ले पता रहितिस ते तोर ये कहानी ला सुनतिसेच कोन? बल्कि कोनो आलोचक के समान मंय भी कहि देतेंव ’छी’। अउ ले अब कहत हंव ’छी’। जोर से चिल्ला के पन-मुसुवा हा किहिस।’’ अउ वोहर अपन पूछी ला मटकावत अपन बिला म खुसर गिस।
’’अउ पन-मुसुवा के सुभाव हा तोला कइसे लगिस?’’ बत्तख हा लिनेट ले पूछिस जउन हा थेरकेच देर पहिली तंउर के वो जघा आ गे रिहिस। ’’वोकर अंदर कतरो खूबी हे, फेर एक माँ होय के हिसाब ले जब कभू मंय हा अइसन आदमी ला देखथंव जउन हा कभू बिहावेच नइ करे होय तब मोला रोवासी आ जाथे।’’
’’मोला लगथे कि मंय हा वोला नाराज कर देंव,’’ लिनेट हा जवाब दिस। ’’असल में मय हा वोला एक अइसन कहानी सुनाय हंव जेमा एक नहीं बल्कि कतनो सीख भरे पड़े हे।’’
’’ओह! तब तो बहुत खरनाक काम करे हस।’’ बत्तख हा किहिस, ’’कोनो ला सिखउनी बात कहना बड़ खतरनाक होथे।’’
अउ बत्तख के बात ले महूँ हा पूरा-पूरा सहमत हंव।
000
कोई टिप्पणी नहीं:
एक टिप्पणी भेजें