रहस्यहीन रहस्यमयी स्त्री
आस्कर वाइल्ड
छत्तीसगढ़ी म अनुवदक - कुबेर
एक दिन मंय हा मंझनिया बेरा ’कैफे डी ला पैक्स’ के आंगन म बइठे-बइठे पेरिस शहर के जीवन के चकाचौंध अउ बदहाली ला देखत रेहेंव। अपन ’वर्मूथ’ (एक प्रकार के शराब) ला पीयत-पीयत मंय हा अपन आगू सड़क म आवत-जावत अमीरी के अकड़ अउ गरीबी के तंगहाली के अजब-गजब नजारा के बारे म सोचत बइठे रेहेंव तभे कोनो हा मोर नाव धरके मोला बलाइस। मंय हा मुड़कके देखेंव। वोहर लार्ड मर्चिसन रिहिस। हमन तकरीबन दस साल पहिली कॉलेज म एक संग पढ़त रेहेन।
कॉलेज छूटे के बाद दुबारा मुलाकात अउ नइ होय रिहिस। वोकर ले दुबार मिलके मोला बड़ खुशी होइस। हमन गजब खुश होके हाथ मिलायेन। आक्सफोर्ड म हमन जिगरी दोस्त रेहेन। मंय हा वोला बहुतेच चाहंव। वोहर बहुतेच सुंदर, सदा चहकने वाला अउ बहुत ईमानदार रिहिस। हम संगवारीमन वोकर बारे म कहन कि यदि वोहर अतका सच बोलने वाला नइ होतिस ते वोहर अउ जादा बेहतर इंसान होतिस।
फेर अब मोला लगथे कि वोकर इही सच्चाई के सेती हमन वोकर अउ जादा इज्जत करन। अभी मोला लगिस कि वोहर बहुत बदल गे हे। वोहर बहुत परेशान अउ उलझन म दिखत रिहिस। मानो कोनो बात ला लेके वोकर मन म बहुत भारी शंका पैदा हो गे होय। मोला लगिस कि येहर कोनो आधुनिक ’संदेहवाद’ के विचार तो नइ हो सके, काबर कि मर्चिसन हा एक कट्टर ’टोरी’ (रूढ़िवादी) आदमी रिहिस। वोहर ’पेंटाट्यूक’ (धार्मिक ग्रंथ) मन म वोतकच विश्वास करय जितना कि ’हाउस आफ पीयर्स’ (ब्रिटिश संसद के उच्च सदन) म। इही पाय के मंय हा अंदाजा लगायेंव कि मामला कोनो महिला से संबंधित हो सकथे। मंय हा वोला पूछेंव कि का वोकर बिहाव हो गे हे?
वोहर जवाब दिस, ’’मंय हा औरत मन ला आज तक ठीक से समझेच नइ सकेंव।’’
मंय हा केहेंव, ’’प्यारे गेराल्ड! भगवान हा महिलामन ला प्यार करे खातिर बनाय हे, समझे बर नहीं।’’
जवाब म वोहर किहिस, ’’मंय हा उहाँ कभू प्यार नइ कर सकंव जिहाँ मोला विश्वास नइ होही।’’
मंय हा केहेंव, ’’मोला लागथे कि तोर जिनगी म कोनो रहस्य जरूर हे, गेराल्ड; मोला येकर बारे म बता।’’
वोहर किहिस, ’’तब चल कहूँ दूसर जघा। इहाँ बहुत भीड़ हे। नहीं, ये पींयर गाड़ी म नइ, कोनो दूसर गाड़ी म जाबो। हाँ, ये गाढ़ा हरा रंग वाले गाड़ी हा ठीक रही।’’ अउ कुछेक देर म हम ’मैडेलीन’ डहर जावइया सड़क म जावत रेहेन।
मंय हा पूछेंव, ’’हम कहाँ जावत हन?’’
वोहर जवाब दिस, ’’अरे! जिहाँ तोर मन होय।’’
’’चल ’बॉयस’ वाले रेस़्त्रा म चलथन। उहाँ हम खाना खाबोन अउ तंय हा मोला अपन राम कहानी ला सुनाबे।’’
0
’’मंय हा पहिली तोर बारे म जानना चाहहूँ,’’ मंय हा केहेंव, ’’पहली मोला अपन उदासी के रहस्य ला बता।’’
वोहर अपन जेब ले चांदी के क्लैप्स वाला एक छोटकुन चमड़ा के डिबिया निकालिस अउ मोला दिस। मंय हा वोला खोलेंव। भीतर एक महिला के फोटू रिहिस। वोहर लंबी अउ पातर-दुब्बर रिहिस। वोकर बड़े-बड़े आँखीमन बड़ रहस्यमयी दिखत रिहिन। वोकर चेहरा म बिखरे वोकर लट-मन हा वोकर सुंररता ला अउ बढ़ावत रिहिन। वोहर कोनो भविष्यवक्ता कस दिखत रिहिस अउ कीमती फर वाले ओढ़नी ओढ़े रिहिस।
’’ये चेहरा के बारे म तोर का विचार हे?’’ वोहर पूछिस, ’’येमा कोनो सच्चाई दिखत हे?’’
मंय हा चेहरा ला ध्यान लगाके देखेंव। मोला लगिस कि ये चेहरा म कोनो राज छिपे हे; अच्छा कि बुरा, केहे नइ जा सके। वोकर सुंदरता हा अइसने कतरो रहस्य ले मिलके बने रिहिस। वोकर सुंदरता हा वोकर शाररिक बनावट के बजाय वोकर मन के गहराई ले आवत रिहिस। अउ वोकर होंठमन म जउन मुस्कान रिहिस वोहर अतका बारीक रिहिस कि वोला मात्र ’प्यारी मुस्कान’ भर नइ केहे जा सकत रिहिस।
’’तो?’’ वोहर बहुत उतावला होके पूछिस, ’’का कहना हे?’’
’’येहर तो फर ओढ़के ’जियोकोंडा’ (एक प्रसिद्ध ओपेरा गायिका) जइसन दिखत हे।’’ मंय हा जवाब देयेंव, ’’पहिली मोला येकर बारे म पूरा बता।’’
’’अभी नहीं’’, वोहर किहिस, ’’खाना खाय के बाद,’’ अउ हम दूसर गपशप करे लगेन।
वेटर हा जब हमर बर कॉफी अउ सिगरेट धर के आइस तब मंय हा गेराल्ड ला वोकर वादा के सुरता करायेंव। वोहर अपन सीट ले उठिस अउ तीन घांव येती-वोती टहलिस। तब अपन आराम कुरसी म बइठत मोला ये कहानी ला सुनाइस -
’’एक शाम,’’ वोहर बताइस, ’’तकरीबन पांच बजे मंय हा बॉण्ड स्ट्रीट म टहलत रेहेंव। इहाँ गाड़ी मन के रेलम-पेलम होवत रिहिस। भीड़ के मारे आवाजाही हा थमे कस हो गे रिहिस।
फूटपाथ कना एक ठन छोटे अकन पींयर बग्घी ’ब्रुअम’ (इतवनहींउ. चार चक्का वाले अउ एक घोड़ा द्वारा खींचने वाला सुंदर बंद बग्घी। 1838 म एक प्रसिद्ध व्यक्ति स्वतक इतवनहींउ के नाम म येकर नाम पड़िस) खड़े रिहिस। कोनो कारण से मंय हा विही बग्घी ला एकटक देखत रेहेंव। जइसने मंय हा वोकर नजीक ले गुजरेंव, बग्घी ले विही चेहरा हा मोला झांकत दिखिस जउन ला आज मंझनिया मंय हा तोला देखाय हंव। वोला देखके मंय हा मोहाय कस हो गेंव।
रातभर अउ दूसर दिन घला मंय हा वोकरेच बारे म सोचत पहायेंव। वोकर झलक पाय के आशा म मंय हा वो सड़क म येती-वोती दिनभर भटकेंव। हर गाड़ी के भीतर झांक-झांकके देखंव। वो पींयर बग्घी के अगोरा करत रेहेंव। फेर वो ’सुंदर अनजान महिला’ हा मोला नइ दिखिस। थक-हार के मंय हा सोचे लगेंव कि वोहर एक सपना रिहिस।
तकरीबन हफ्ता भर बाद मंय हा मैडम डी रास्टेल के संग रात के खाना खाय बर वोकर घर गे रेहेंव। खाना खाय बर आठ बजे के समय तय होय रिहिस। फेर साढ़े आठ बजत ले हमन भोजन कक्ष म ककरो अगोरा करत रेहेन। तभे नौकर हा आके बताइस कि ’लेडी अलरॉय’ हा पहुँच गे हे।
येहर विही महिला रिहिस जउन ला मंय हा खोजत रेहेंव। वोहर आस्ते-आस्ते भीतर आइस। भुरुवा रंग के पोशाक म वोहर बिलकुल चंदा कस दिखत रिहिस। मोला बड़ खुशी होइस जब मोला केहे गिस कि वोला मंय हा खाना खाय के मेज तक लेके जांव। बइठे के बाद मंय हा बहुत सहज भाव ले पूछेंव, ’लेडी अलरॉय! मोला लगथे कि कुछ दिन पहिली मंय हा आपला ’बॉण्ड स्ट्रीट’ म देखे रेहेंव।’
वोकर चेहरा हा एकदम पीला पड़ गिस। वोहर धीरे ले किहिस, ’कृपा करके अतका जोर से झन बोलव। कोनो हा सुन सकथे।’
मोला बहुत खराब लगिस कि शुरुच म गलती हो गिस। फेर घबरा के मंय हा बात के विषय ला बदल के फ्रेंच नाटक कोती फेर देंव।
वोहर बहुतेच कम बोलत रिहिस। जब बोतिस बहुत धीरे अउ सुरीली आवाज म बोलतिस। अइसे लगत रिहिस कि वोला भय रिहिस कि कोनो हा वोकर बात ल सुन झन लेय।
मोला वोकर ले बहुत गहरा प्यार हो गिस। वोकर चारों मुड़ा छाय रहस्य के वातावरण हा मोर उत्सुकता ला अउ बढ़ावत रिहिस। खाना खतम होय के बाद जब वोकर तुरंत जाय बर उठिस तब मंय हा वोकर ले पूछेंव कि का मंय हा वोकर ले मिले खातिर आ सकथंव। पल भर वोहर हिचकिचाइस, आजू-बाजू ला देखिस कि कोनो है का, अउ धीरे ले किहिस, ’’हाँ, कल पौने पांच बजे।’’
वोकर जाय के बाद मंय हा मैडम डि रास्टेल से वोकर बारे म पूछे के कोशिश करेंव। वोहर मोला सिरिफ अतकच बताइस कि चोहर एक विधवा औरत हरे अउ पार्क लेन म वोकर सुंदर घर हे।
अउ उहाँ जब एक झन उबाऊ अउ वैज्ञानिक किस्म के आदमी हा विधवामन ऊपर भाषण देवत ये किहिस कि एक सफल विवाहित व्यक्ति के उदाहरण वोहर खुदे हरे। तब मंय हा उहाँ ले उठ के चल देंव।
0
आगू दिन मंय हा बिलकुल सही समय म पार्क लेन पहुँच गेंव। फेर नौकर हा बताइस कि लेडी अलरॉय हा अभिच बाहर निकलिस हे। मंय हा निराशा अउ दुविधा म क्लब चले गेंव। काफी सोच-विचार करे के बाद मंय हा वोला एक चिट्ठी लिखेंव अउ पूछेंव कि का कोनो दूसर दिन मोला अपन किस्मत आजमाय के मौका मिल सकत हे?
कई दिन हो गिस, कोनो जवाब नइ मिलिस। आखिरकार मोला एक ठन छोटे असन चिट्ठी मिलिस। लिखाय रिहिस कि वोहर इतवार के चार बजे घर म मिलही। संगे संग एक अजीब बात घला लिखाय रिहिस, ’कृपा करके मोला इहाँ चिट्ठी मत लिखे करव। मिले के बाद मंय हा आप ला सब बात समझा के बताहूँ।’
इतवार के दिन वोहर मोला मिलिस। वोकर बर्ताव हा बहुत मनमोहक रिहिस। फेर जब मंय हा लहुटे लगेंव तब वोहर मोर से मनुहार करिस कि यदि दुबारा चिट्ठी लिखे के मन होही तब मंय हा वोला ’मिसेज नॉक्स, केयर आफ क्रिकेटर्स लायब्रेरी, ग्रीन स्टीªट’ के पता म भेजंव। वोहर किहिस, ’येकर कुछ कारण हे कि मंय हा चिट्ठी ला अपन घर के पता म कभू नइ मंगवा सकंव।’
वो मौसम के बीतत ले मंय हा वोकर ले कतरो घांव मिलेंव। फेर वोकर आस-पास के रहस्य ला कभू समझ नइ सकेंव। कभू मोला अइसे लगय कि वोहर कोनो दूसर आदमी के फांदा म फंसे हे। फेर ये विचार हा मोला कभू सच नइ लगिस। तब वोकर संबंध म कोनो अंतिम राय बनाना मोर बर बड़ मुश्किल हो गिस काबर कि वोहर वो अजीब चमकदार रत्न के समान रिहिस जउनमन खाली अजायब घर म सजे दिखथें, जउन हा एक पल चमकत दिखथे अउ दूसर पल म धुंधरा।
0
आखिरकार मंय हा वोला अपन पत्नी बनाय के अउ ये बात ला वोला केहे के फैसला कर लेंव। मंय हा वोकर सरलग रहस्यमय बने रहने वाला व्यवहार ले तंग आ चुके रेहेंव जउन हा मेल-मुलाकात के समय जाहिर होय या कि वोकर भेजे चिट्ठी मन ले।
मंय हा लायब्रेरी के पता म चिट्ठी लिखके वोकर ले पूछेंव कि आवइया सोमवार के दिन शाम छै बजे मिल सकथे का?
वोहर ’हाँ’ में जवाब दिस।
मंय हा बहुत खुश होयेंव। मंय हा वोकर ऊपर पूरा-पूरा निछावर हो गे रेहेंव। मोला लगिस कि ये सब हा वोकर रहस्यमयी व्यवहार के सेती हरे। फेर अब समझ म आवत हे कि बात असल म कुछ दूसर रिहिस। नहीं, मंय तो वो औरत ले सिरिफ प्यार करंव फेर वोकर रहसयमय व्यवहार हा मोला परेशान करत रहय अउ मोला पागल बना दे रहय। किस्मत हा आखिर मोला वोकर ले काबर मिलाइस?’’
’’तब का तंय हा ये बात के पता लगा सकेस?’’ मंय हा पूछेव।
’’मोला तो अइसनेच लगथे।’’ वोहर जवाब दिस। ’’तंय हा खुदे अंदाजा लगा ले।’’
0
’’सोमवार के दिन मंय हा अपन चाचा संग लंच करे खातिर तकरीबन चार बजे मेलिबोर्न सड़क म जाय बर निकलेंव। तोला पता हे, मोर चाचा हा रीजेंट्स पार्क म रहिथे। मोला पिकाडेली जाना रिहिस। विही पाय के अरकट्टा जायबर मंय हा कोलकी-कोलकी वाला रद्दा पकड़ेंव। अचानक मंय हा लेडी अलरॉय ला देख परेंव। वोहर अपन चेहरा ला घुमघुम ले पूरा ढंके रिहिस अउ बहुत तेज चाल चलत रिहिस। गली के आखिरी घर म पहुँचके वोहर दुवारी के सिढ़िया म चढ़के अपन जेब ले चाबी निकालिस, ताला खोलिस अउ भीतर चल दिस। मंय हा मनेमन केहेंव, ’तब इही हा वोकर व्यवहार के राज हरे।’ अउ मंय हा जल्दी अपन रद्दा म आगू बढ़ गेंव। वो घर ला देखेंव। मोला लगिस कि येहर किराया म कमरा देने वाला घर हरे। दरवाजा के चौंखट तीर वोकर रुमाल हा परे रिहिस जउन हा अनजाना म गिर गे रिहिस होही। मंय हा वोला उठा के रख लेंव अउ सोचे लगेंव कि अब मोला का करना चाही। अउ मंय हा ये नतीजा निकालेंव कि वोकर जासूसी करे के मोला कोनो अधिकार नइ हे। अउ गाड़ी चला के क्लब चल देंव।
सांझ के छै बजे मंय हा वोकर ले मिले बर गेंव। वोहर सोफा म ढलंगे रिहिस अउ चांदी के किनारा लगे गाऊन पहिरे रिहिस जउन ला अजीब ढंग ले चंद्र मणि ले सजाय गे रिहिस। ये रत्न ला वोहर हमेशा पहिने। वोहर बिकट सुंदर दिखत रिहिस। किहिस, ’’तोला देख के मोला बड़ खुशी होइस। आज दिनभर मंय हा घर ले बाहिर नइ निकले हंव।’’
मंय हा हैरान होके वोला देखत रहि गेंव। फेर अपन जेब ले वोकर रुमाल ला निकालके वोला दे देंव अउ एकदम शांत भाव ले केहेंव, ’’लेडी अलरॉय! आज मंझनिया कमनोर स्ट्रीट म आपके ये रुमाल हा गिर गे रिहिस।’’
वोहर डर के मारे मोला देखत रहि गिस फेर रुमाल ला लेय के कोनो कोशिश नइ करिस। मंय हा पूछेंव, ’’आप उहाँ का करत रेहेव?’’
वोहर जवाब दिस, ’’मोर से अइसन सवाल पूछे केे आप ला का अधिकार हे?’’
मंय हा केहेंव, एक अइसन इंसान के हक जउन हा आप ले बेहद प्यार करथे। मंय हा इहाँ आप ला अपन पत्नी बने बर केहे खातिर आय हंव।’’
वोहर अपन चेहरा ला छुपा लिस अउ फूट-फूट के रोय लगिस। मंय हा फेर केहेंव, आपला बताय बर तो पड़हिच।’’
वोहर खड़े हो गिस। सोझ मोर आँखी म देखत किहिस, ’’लार्ड मर्चिसन, आप ला बताय बर मोर कना कुछुच नइ हे।’
मंय हा केहेंव, ’’सच तो इही हरे कि आप उहाँ ककरो से मिले बर गे रेहेव।’’
वोकर चेहरा हा झक सफेद पड़ गिस। वोहर किहिस, ’’मंय ककरो ले मिले खातिर नइ गे रेहेंव।’’
मंय हा पूछेंव, ’’का आप सच बात ला नइ बता सकव।’’
वोहर किहिस, ’’मंय हा सचे बात ला बताय हंव।’’
मंय हा पगला गेंव। अपन आपा खो डरेंव अउ पता नहीं वोला का का कहि डरेंव। ये तो तय हे कि मंय हा वोला बहुत गलत-सलत केहेंव। अउ घर ले बाहिर निकल गेंव।
अगला दिन वोहर मोला चिट्ठी भेजिस।
दूसर दिन मंय हा बिना खोले वोला वापिस कर देंव। अउ एलन कोलविले संग नार्वे जाय बर निकल गेंव।
एक महीना बाद मंय हा वापिस अयेंव तब ’मार्निंग पोस्ट’ अखबार म सबले पहिली मंय हा लेडी अलरॉय के मौत के खबर ला देखेंव। ओपेरा म वोला ठंड लग गे रिहिस अउ फेफड़ा म संक्रमण होय के कारण पांच दिन म वोकर मौत हो गिस। मंय हा खुद ला कमरा म बंद कर लेंव अउ ककरो ले नइ मिलेंव। मंय हा वोकर ले बहुत प्यार करंव। जी-जान ले वोला चाहंव। हे भगवान! मंय हा वो औरत ले कितना प्यार करंव।’’
’’का तंय हा वो गली म अउ वो घर म दुबारा जाके कुछ पता करेस?’’ मंय हा पूछेंव।
’’हाँ,’’ वोहर जवाब दिस। ’’एक दिन मंय हा कमनोर स्ट्रीट गे रेहेंव। मंय हा स्वयं ल रोक नइ सकेंव। मोर मन के भरम हा मोला जलावत रिहिस। मंय हा दरवाजा खटखटायेंव। दिखे म भले घर के एक महिला हा दरवाजा खोलिस। मंय हा वोला पूछेंव कि किराया वाला कोनो खोली खाली हे?
वोहर जवाब दिस, ’’सर, ड्राइंग रूम हा किराया म रिहिस फेर तीन महीना हो गिस वो महिला ला मंय हा दुबारा नइ देखे हंव। अउ वोकर किराया हा घला बकाया हे तउन पाय के आप वोला ले सकथव।’’
मंय हा वोकर फोटो दिखाके वोला पूछेंव, ’’इही महिला हरे का?’’ वोहर झकनका के किहिस, ’’हाँ! पक्का इही हरे। अउ सर, वोहर वापिस कब आही?’’
मंय हा केहेंव, ’’वो महिला अब ये दुनिया म नइ हे।’’
वो औरत हा किहिस, ’’सर, अइसन मत कहव। वोहर मोर सबले बढ़िया किरायादार रिहिस। वोहर हफ्ता के मोला तीन गिनी किराया देवय। बस कभू-कभू मोर ड्राइंग रूम आके मोर संग बइठेच बर।’’
मंय हा पूछेंव, ’’का वोहर इहाँ ककरो ले मिलय?’’
वो औरत हा मोला कसम देके किहिस कि बिलकुल नहीं। वोहर हमेशा अकेल्ला आवय अउ ककरो ले नइ मिलय।
’’तब वोहर इहाँ का करे बर आवय?’’ मंय हा हैरान होके वोला पूछेंव।
वोहर जवाब दिस, ’’सर, वोहर ड्राइंग रूम म बइठ के खाली किताब पढ़े करतिस। बीच-बीच म चाय पी लेय।’’
मोला समझ नइ आइस कि मंय हा का कहंव। मंय हा वो औरत ला एक सॉवरेन के सिक्का (सोन के सिक्का) देके उहाँ ले चले आयेंव।
0
अब मंय हा सोचथंव कि ये सब के मतलब का रिहिस? का आप ला यकीन नइ होवत हे कि वो औरत हा सच कहत रिहिस?’’
’’मोला यकीन हे।’’
’’तब फेर लेडी अलरॉय हा उहाँ काबर जाय?’’
’’मोर मयारुक गेराल्ड!’’ मंय हा जवाब देंव। ’’लेडी अलरॉय हा बस एक अइसन स्वभाव वाले महिला रिहिस जउन ला रहस्यमय जीवन जीये के बहुत शौक रिहिस। वोहर अपन पूरा चेहरा ला ढांकके उहाँ जावय अउ खुद ला कोनो रहस्यमयी कहानी के नायिका समझके खुश होवय। वोला अपन चारों कोती रहस्यमय वातावरण बुने के शौक रिहिस। फेर वोहर एक अइसन महिला रिहिस जेकर जीवन म कोनो रहस्य रिहिसेच नहीं।’’
’’का वाकई आप ला अइसन लगथे?’’
’’मोला पक्का यकीन हे,’’ मंय हा जवाब देयेव।
गेराल्ड हा मोरक्को चमड़ी के वो डिब्बा ला निकालिस, वोला खोलिस अउ वो तसवीर ला मनभर देखिस अउ किहिस, ’’पता नहीं।’’
...........................................................................................................................................................
कोई टिप्पणी नहीं:
एक टिप्पणी भेजें